បរទេស៖ លោក Ole Gunnar Solskjaer អ្នកចាត់ការទូទៅរបស់ក្រុម Manchester United បានទទួលស្គាល់ថា ក្រុមរបស់លោកមិនអាចធ្វើឲ្យភ្លាតស្នៀតម្តងទៀតឡើយ នៅពេលប្រកួតជាមួយនឹងក្រុម Istanbul Basaksehir នៅរាត្រីនេះ ប្រសិនបើពួកគេចង់ឈានទៅប្រកួតក្របខ័ណ្ឌ Champions League វគ្គ១៦ក្រុមចុងក្រោយ។
Man United បានចាប់ផ្តើមយ៉ាងល្អក្នុងការប្រកួតពូល H តាមរយៈការដណ្តើមបានជ័យជម្នះ២លើក លើក្រុមជើងខ្លាំង Paris Saint-Germain និង RB Leipzig ដែលសុទ្ធសឹងជាក្រុមបានឈានទៅវគ្គពាក់កណ្តាលផ្តាច់ព្រ័ត្រនៃក្របខ័ណ្ឌ Champions League កាលពីរដូវកាលមុន។ ប៉ុន្តែ ទោះបីជាយ៉ាងណា ការរងបរាជ័យក្នុងលទ្ធផល ២-១ ក្នុងប្រទេសតួកគី កាលពី៣សប្តាហ៍មុន បានដាក់សម្ពាធត្រឡប់មកវិញ នៅពេលដែលក្រុម Basaksehir ធ្វើដំណើរទៅកាន់កីឡដ្ឋាន Old Trafford នៅរាត្រីនេះ។ Man United នៅតែនាំមុខលើកំពូលតារាង ដោយមាន៦ពិន្ទុ រួមជាមួយនឹងក្រុម Leipzig ខណៈដែល PSG និង Basaksehir មាន៣ពិន្ទុដូចគ្នា។
លោក Solskjaer បានប្រាប់សន្និសីទសារព័ត៌មានមុនការប្រកួតថា៖ «យើងត្រូវការយ៉ាងហោណាស់១០ពិន្ទុ ដើម្បីឈានទៅវគ្គបន្ត ប៉ុន្តែ ទោះបីបែបនោះយើងត្រូវតែរកឲ្យបាន១២ពិន្ទុ។ យើងនឹងឈានទៅកាន់ការប្រកួតនេះ ដោយត្រូវដណ្តើមយកជ័យជម្នះ និងព្យាយាមឈ្នះជាមួយនឹងទម្រង់លេងយ៉ាងល្អ ពីព្រោះយើងនៅសល់ការប្រកួតជាច្រើនទៀត»៕
ប្រភពព័ត៌មាន៖ Channel News Asia