បរទេស៖ លោក Ole Gunnar Solskjaer អ្នកចាត់ការទូទៅរបស់ក្រុម Manchester United សង្ឃឹមថា ការលើកពានក្របខ័ណ្ឌ Europa League នឹងក្លាយជាចំណុចចាប់ផ្តើមនៃការឈ្នះពានជាច្រើនទៀតសម្រាប់ក្លិបនេះ។
Man United នឹងត្រូវប្រកួតជាមួយនឹងក្រុមអេស្ប៉ាញ Villarreal ក្នុងវគ្គផ្តាច់ព្រ័ត្រនៅរាត្រីនេះ នៅទីក្រុង Gdansk ដោយពួកគេកំពុងតែស្រេកឃ្លានក្នុងការឈ្នះពានជាលើកទី១របស់ពួកគេ បើគិតចាប់តាំងពីបានលើកពាន Europa League ក្រោមកាដឹកនាំរបស់លោក Jose Mourinho ក្នុងឆ្នាំ២០១៧។ ក្រោយពីបានបញ្ចប់ក្នុងចំណាត់ថ្នាក់លេខ២ ក្នុងក្របខ័ណ្ឌ Premier League នៅរដូវកាលនេះ ដែលជាចំណាត់ថ្នាក់ដ៏ខ្ពស់បំផុតរបស់ពួកគេ ក្នុងចំណោមការកាន់តំណែងរយៈពេល៣រដូវកាលរបស់គ្រូបង្វឹកសញ្ជាតិន័រវែសរូបនេះ លោក Solskjaer កំពុងតែកំណត់គោលដ៏ខ្ពស់ ស្របពេលដែលោកសម្លឹងរករក្សាជ័យជម្នះសម្រាប់ Man United ដូចកាលពីមុន។
លោក Solskjaer បានប្រាប់សន្និសីទសារព័ត៌មានកាលពីថ្ងៃអង្គារថា៖ «យើងត្រូវជួបរាត្រីដ៏សំខាន់មួយ ហើយវាប្រហែលជាការបោះជំហានដ៏ធំមួយឆ្ពោះទៅកាន់ភាពល្អប្រសើរទៅថ្ងៃអនាគត។ វាជាអនាគតដ៏ត្រចះត្រចង់សម្រាប់ក្រុមនេះ ដែលជុំដោយកីឡាករវ័យក្មេង។ នេះគឺជាក្រុមដែលយើងបានបង្កើតឡើងក្នុងរយៈពេលប៉ុន្មានឆ្នាំចុងក្រោយនេះ។ ជាការរំពឹងទុក នេះគឺជាចាប់ផ្តើមនៃការឈ្នះពានជាច្រើនទៀត»៕
ប្រភពព័ត៌មាន៖ Channel News Asia
