បរទេស៖ លោក Ole Gunnar Solskjaer បានលើកឡើងប្រាប់កូនក្រុមក្លឹបបិសាចក្រហម Man. Utd ថាក្រុម កំពុងមានវត្តមានបច្ចុប្បន្នគឺល្អជាងអតីតក្រុមរៀមច្បងដែលធ្លាប់ឈ្នះពានរង្វាន់បីធំៗក្នុងឆ្នាំ ១៩៩៩ ទៅទៀតដោយយោងគេហទំព័រ The Sun បានចុះផ្សាយ។ លោក Solskjaer ធ្លាប់លេងក្នុងនាមខ្សែប្រយុទ្ធដោយធ្លាប់សាងភាពល្បីល្បាញនៅរដូវកាល១៩៩៨-១៩៩៩ ដោយរកបាន ១៨ គ្រាប់ក្នុងការប្រកួតគ្រប់ក្របខណ្ឌទាំងអស់រួមទាំងជ័យជំនះជាប្រវត្តិសាស្ត្រទល់និង Bayern Munich ក្នុងវគ្គផ្តាច់ព្រ័ត្រនៃក្របខ័ណ្ឌ Champions League ។
ការលើកឡើងរបស់លោកSolskjaer ខាងលើកើតមានឡើង ក្រោយពីក្លឹបបានបំពេញការចុះ ហត្ថលេខាកីឡាករសំខាន់៣រូបនៅរដូវក្តៅនេះមានដូចជាJadon Sancho, Raphael Verane និង Cristiano Ronaldo ដែលត្រូវបានរូបលោកចាត់ទុកថាជារឿងដែលក្លឹបមានសុទិដ្ឋិនិយមបំផុតដើម្បីឈ្នះពាន Premier League នាពេលខាងមុខ។ ទោះយ៉ាងណាក្រោយពីលោក Sir Alex Ferguson ចូលនិវត្តន៏ក្លឹបមិនដែលធ្លាប់ឈ្នះពាន៣ក្នុង១រដូវកាលនោះឡើយ។ ដូច្នេះហើយទើបអ្នកចាត់ការទូទៅសញ្ជាតិន័រវេរូបនេះមានបំណងនិងក្តីសុបិន្តចង់បញ្ចប់ការរង់ចាំរយៈពេល ៩ ឆ្នាំគឺច ង់ ឈ្នះ ពាន ក្របខ័ណ្ឌ Premier League នៅរដូវកាល ២០២១-២០២២ នេះ។
Man United ទទួលបាន ៧ ពិន្ទុពីការប្រកួតបើកឆាក Premier League ៣ លើករបស់ពួកគេនៅរដូវកាលនេះហើយលោក Solskjaer មើលឃើញថាក្រុមតោខៀវ Chelsea គឺជាគូប្រជែងធំបំផុតក្នុងការប្រជែងពានរដូវកាលនេះ៕
ប្រភពព័ត៍មាន៖ Sportsmole
