បរទេស៖ ខ្សែប្រយុទ្ធ Kylian Mbappe និង Neymar ចាំបាច់ត្រូវតែស្វែងរកភាពមុតស្រួចរបស់ពួកគេក្នុងការប្រកួតក្របខ័ណ្ឌ Champions League ត្រឡប់មកវិញ នៅពេលដែលក្រុមញាំញីដោយរបួស Paris St Germain ប៉ះជាមួយនឹងក្រុម RB Leipzig ក្នុងការប្រកួតពូល H នៅរាត្រីនេះ។
ខ្សែប្រយុទ្ធទាំង២ បានវិលចូលលេងវិញ ក្រោយពីការអវត្តមានដោយសារតែរបួស ប៉ុន្តែ Neymar មិនស៊ុតបាល់បញ្ចូលទីសោះ ក្នុងការប្រកួតក្របខ័ណ្ឌ Champions League ៥លើកចុងក្រោយរបស់គេ ស្របពេលដែល Mbappe មិនធ្លាប់បានស៊ុតបាល់បញ្ចូលទីសោះក្នុងយុទ្ធនាការនេះ ក្នុងចំណោមការប្រកួត៧លើកចុងក្រោយរបស់គេ។ លោក Thomas Tuchel ដែលជាគ្រូបង្វឹក បានប្រាប់សន្និសីទសារព័ត៌មានមួយកាលពីថ្ងៃចន្ទថា៖ «យើងពិតជាមានបញ្ហា ប្រសិនបើ Kylian Mbappe និង Neymar មិនស៊ុតបាល់បញ្ចូលទីទេនោះ។
ពួកគេមានឥទ្ធិពលដ៏ធំមួយ ពួកគេជាកីឡាករសំខាន់ ហើយខ្ញុំសង្ឃឹមថា ពួកគេអាចស៊ុតបាល់បញ្ចូលទីនៅថ្ងៃស្អែកនេះ»។ គ្រូបង្វឹកសញ្ជាតិអាល្លឺម៉ង់រូបនេះ ត្រូវតែរៀបចំក្រុមដោយគ្មានខ្សែការពារ Thilo Kehrer និង Juan Bernat ខ្សែបម្រើ Marco Verratti និង Julian Draxler ក៏ដូចជាខ្សែប្រយុទ្ធ Mauro Icardi។ ជាធម្មតា ក្រុម PSG នឹងពឹងផ្អែកទៅលើតំបន់ប្រយុទ្ធរបស់ពួកគេ នៅពេលដែលប្រកួតជាមួយនឹងក្រុមដែលពួកគេបានទម្លាក់ក្នុងវគ្គពាក់កណ្តាលផ្តាច់ព្រ័ត្រ កាលពីរដូវកាលមុន៕
ប្រភពព័ត៌មាន៖ Channel News Asia