បរទេស៖ ក្រុម Juventus, Chelsea និង Sevilla សុទ្ធសឹងដណ្តើមបានជ័យជម្នះដូចគ្នា ខណៈដែលពួកគេបានឈ្នះកៅអីទៅកាន់វគ្គ១៦ក្រុមចុងក្រោយនៃក្របខ័ណ្ឌ Champions League កាលពីថ្ងៃអង្គារ ស្របពេលដែលកីឡាករ Martin Braithwaite បានស៊ុតបាល់បញ្ចូលទី២គ្រាប់ក្នុងពេលក្រុម Barcelona បានយកឈ្នះលើក្រុម Dynamo Kiev ៤-០ ដើម្បីឈ្នះកៅអីទៅវគ្គបន្តដូចគ្នា។
ក្រុមទាំង៤ គឺជាក្រុមដំបូងគេដែលបានឆ្លងផុតវគ្គចែកពូល ខណៈដែលនៅសល់ការប្រកួត២លើកទៀត។ ក្រុម Barcelona បានលេងដោយគ្មានតារាឆ្នើម Lionel Messi សម្រាប់ការប្រកួតនៅទឹកដីអ៊ុយក្រែន ប៉ុន្តែ ក្រុមរបស់លោក Ronald Koeman ធ្វើបានយ៉ាងល្អ ដើម្បីកត់ត្រាជ័យជម្នះ៤លើកពីការប្រកួតទាំង៤លើកក្នុងពូល G។ លោក Koeman បានឲ្យដឹងថា៖ «យើងបានសម្រេចគោលដៅរបស់យើងហើយ។ យើងបង្ហាញពីភាពស្រេកឃ្លាន និងបានស៊ុតបាល់បញ្ចូលទី៤គ្រាប់។ កីឡាករសំខាន់ៗអាចសម្រាកបានហើយ ហើយកីឡាករវ័យក្មេងមានឱកាសលេង»។
Juventus បានចូលរួមជាមួយនឹងក្រុម Barcelona ក្នុងការឈ្នះកៅអីទៅវគ្គបន្តក្នុងពូល G តាមរយៈគ្រាប់បាល់នៅជិតបញ្ចប់ការប្រកួតពីខ្សែប្រយុទ្ធ Alvaro Morata ដើម្បីផ្តួលក្រុម Ferencvaros ២-១ ក្នុងទីក្រុង Turin។ ជាមួយគ្នានេះ ក្រុម Chelsea និង Sevilla ក៏បានឈ្នះកៅអីរបស់ខ្លួនទៅវគ្គ១៦ក្រុមចុងក្រោយផងដែរ ក្រោយពីបានផ្តួលក្រុម Rennes និង Krasnodar ក្នុងលទ្ធផល ២-១ ដូចគ្នា នាការប្រកួតនៅថ្ងៃដដែលនោះ៕
ប្រភពព័ត៌មាន៖ Channel News Asia
