បរទេស៖ លោក Thomas Tuchel គ្រូបង្វឹករបស់ក្រុម PSG បានទទួលស្គាល់ថា លោកពិតជា «ភ្ញាក់ផ្អើល» ចំពោះខ្សែប្រយុទ្ធ Kylian Mbappe ជុំវិញការមិនអាចរកបានគ្រាប់បាល់ក្នុងក្របខ័ណ្ឌ Champions League នៅមុនពេលការប្រកួតដ៏សំខាន់ជាមួយនឹងក្រុម Manchester United នារាត្រីកីឡដ្ឋាន Old Trafford រាត្រីនេះ។
ខ្សែប្រយុទ្ធឈ្នះពាន World Cup រូបនេះ ដែលបានស៊ុតបាល់បញ្ចូលទី ក្នុងពេលដែលក្រុម PSG បានទទួលជ័យជម្នះក្នុងលទ្ធផល ២-០ សម្រាប់ការប្រកួតជាលើកចុងក្រោយរបស់ពួកគេ នៅលើទឹកដី Man United ក្នុងវគ្គ១៦ក្រុមចុងក្រោយ កាលពីខែមករា ឆ្នាំ២០១៩នោះ បច្ចុប្បន្ន មិនបានរកគ្រាប់បាល់បញ្ចូលទីសោះសម្រាប់ការបង្ហាញខ្លួន៨លើកចុងក្រោយក្នុងក្របខ័ណ្ឌ Champions League។ គ្រាប់បាល់លើកចុងក្រោយរបស់ពួកគេក្នុងយុទ្ធនាការនេះ បានកើតឡើងក្នុងពេលប្រកួតលើទឹកដីខ្លួនឯងជាមួយនឹងក្រុម Galatasaray ក្នុងវគ្គចែកពូលកាលពីរដូវកាលមុន ពោលគឺនៅថ្ងៃទី១១ ខែធ្នូ ឆ្នាំ២០១៩។ ក្នុងសន្និសីទសារព័ត៌មាននៅមុនពេលការប្រកួតកាលពីថ្ងៃអង្គារ លោក Tuchel បានកត់សម្គាល់ថា៖ «ខ្ញុំបានឮពីស្ថិតិនេះកាលពី១ម៉ោងមុន ហើយខ្ញុំពិតជាភ្ញាក់ផ្អើលណាស់»។
Mbappe ដែលនឹងឈានចូលវ័យ២២ឆ្នាំ នៅចុងខែនេះ គឺជាអ្នករកបានគ្រាប់បាល់ច្រើនជាងគេក្នុងក្របខ័ណ្ឌ Ligue 1 នៅរដូវកាលនេះ តាមរយៈការរកបាន៩គ្រាប់ ក្នុងការបង្ហាញខ្លួន៨លើក ប៉ុន្តែ មិនអាចរកភាពមុតស្រួចក្នុងក្របខ័ណ្ឌអឺរ៉ុបឡើយ ខណៈដែល PSG បានជួបភាពត្រដាបត្រដួស តាមរយៈការឈ្នះ២លើក ចាញ់២លើក ក្នុងចំណោមការប្រកួត៤លើកចុងក្រោយរបស់ពួកគេ ក្នុងពូល H៕
ប្រភពព័ត៌មាន៖ Channel News Asia