បរទេស៖ គ្រាប់បាល់ស៊ុតបញ្ចូលទី២គ្រាប់របស់ Neymar បានជួយឲ្យក្រុម Paris Saint-Germain ដណ្តើមបានជ័យជម្នះដ៏សំខាន់ក្នុងលទ្ធផល ៣-១ លើក្រុម Manchester United កាលពីថ្ងៃពុធ ខណៈដែលជ័យជម្នះនេះ ធ្វើឲ្យក្រុមជើខ្លាំងរបស់បារាំង ស្ថិតយ៉ាងប្រកៀកឆ្ពោះទៅកាន់វគ្គ១៦ក្រុមចុងក្រោយនៃក្របខ័ណ្ឌ Champions League កាលពីថ្ងៃពុធ។
ជាមួយគ្នានេះ ក្រុម Borussia Dortmund ក៏បានឈ្នះកៅអីទៅវគ្គបន្តផងដែរ ក្រោយពីបានបញ្ចប់ក្នុងលទ្ធផលស្មើ ១-១ ជាមួយនឹងក្រុម Lazio។ ក្រុម PSG នឹងស្ថិតកាន់តែកៀកឆ្ពោះទៅកាន់ការធ្លាក់ចេញ ប្រសិនបើពួកគេរងបរាជ័យនៅកីឡដ្ឋាន Old Trafford ប៉ុន្តែ Neymar បានធ្វើឲ្យក្រុមម្ចាស់ជើងឯករងកាលពីឆ្នាំមុនមួយនេះ នាំមុខមុននៅនាទី ទី៦ មុននឹងបំពេញជ័យជម្នះសម្រាប់ក្រុមខ្លួននៅជិតបញ្ចប់ការប្រកួត។ គ្រាប់បាល់នៅចុងម៉ោងរបស់ Neymar អាចជាគ្រាប់បាល់ដ៏សំខាន់ ខណៈដែលគ្រាប់បាល់នេះជួយឲ្យ PSG មានប្រៀបលើក្រុម Man United ក្រោយពីក្រុមបិសាចក្រហមបានយកឈ្នះក្នុងលទ្ធផល ២-១ កាលពីខែតុលា។
លោក Ole Solskjaer គ្រូបង្វឹករបស់ Man United បានឲ្យដឹងថា៖ «យើងមានឱកាសល្អៗជាច្រើន ហើយនោះគឺជាចំណុចខុសគ្នានៅពេលដែលអ្នកត្រូវប្រកួតក្នុងការប្រកួតធំៗ»។ លទ្ធផលនេះ មានន័យថា PSG ត្រូវការត្រឹមតែស្មើប៉ុណ្ណោះលើទឹកដីខ្លួនឯងពេលប្រកួតជាមួយនឹងក្រុម Basaksehir ដែលចាញ់ក្រុម Leipzig ៤-៣ ដើម្បីទៅវគ្គបន្ត។ Man United ក៏ត្រូវការត្រឹមតែស្មើផងដែរ នៅពេលពួកគេធ្វើដំណើរទៅជួបក្រុម Leipzig នាសប្តាហ៍ក្រោយ ប៉ុន្តែ នឹងត្រូវធ្លាក់ចេញ ប្រសិនបើចាញ់៕
ប្រភពព័ត៌មាន៖ Channel News Asia
