បរទេស៖ ខ្សែបម្រើអន្តរជាតិបារាំង Paul Pogba គួរតែចាកចេញពីក្លិប Manchester United ក្នុងពេលបើកទីផ្សារដោះដូរកីឡាករនាពេលខាងមុខនេះ នៅមុនពេលកិច្ចសន្យារបស់គេផុតកំណត់នៅថ្ងៃទី២២ ខែមិថុនា។ នេះបើយោងទៅតាមពាក្យសម្តីដកស្រង់របស់ភ្នាក់ងារតំណាងឲ្យរូបគេ កាលពីថ្ងៃចន្ទ។
ក្នុងកិច្ចសម្ភាសមួយជាមួយនឹងបណ្តាញសារព័ត៌មាន Tuttosport ដែលត្រូវបានចេញផ្សាយកាលពីថ្ងៃអង្គារ លោក Mino Raiola បានឲ្យដឹងថា៖ «វាជារឿងល្អក្នុងការនិយាយឲ្យបានច្បាស់ សម្លឹងឆ្ពោះទៅមុខ និងមិនបាត់បង់ពេលស្វែងរកអ្នកស្តីបន្ទោស។ Paul មិនសប្បាយចិត្តនៅក្នុងក្លិប Manchester United តែរូបគេមិនអាចសម្តែងពីអារម្មណ៍របស់ខ្លួនបានឡើយ ខណៈដែលរូបគេចង់ណាស់»។ ភ្នាក់ងារតំណាងរូបនេះបានបន្ថែមទៀតថា៖ «រូបគេត្រូវតែផ្លាស់ប្តូរក្រុម។ រូបគេត្រូវតែផ្លាស់ប្តូរបរិយាកាស។ ខ្ញុំគិតថា ដំណោះស្រាយដ៏ល្អបំផុតសម្រាប់ភាគីទាំង២ គឺការលក់រូបគេនៅពេលបើកទីផ្សារដោះដូរកីឡាករនាពេលខាងមុខនេះ»។
Pogba ដែលបានផ្ទេរមកពីក្លិប Juventus ក្នុងឆ្នាំ២០១៦ បានបង្ហាញខ្លួនក្នុងការប្រកួតក្របខ័ណ្ឌ Premier League ៨លើក នៅរដូវកាលនេះ ដោយជាប់ក្នុងជម្រើសទាំង១១នាក់ដំបូងត្រឹមតែ៥លើកគត់ ខណៈដែលរូបគេនៅតែជួបការលំបាកក្នុងការបង្ហាញពីកម្រិតសមត្ថភាពកំពូលរបស់គេក្នុងក្លិបនេះ៕
ប្រភពព័ត៌មាន៖ Channel News Asia
