បរទេស៖ ស្ថានភាពរបួសជង្គង់ស្តាំរបស់ Paul Pogba មិនចាំបាច់ត្រូវការវះកាត់នោះទេ ខណៈដែលខ្សែបម្រើកណ្តាលរូបនេះត្រៀមនិងត្រៀមខ្លួនចូលលេងឱ្យ Juventus វិញក្នុងរយៈពេលប៉ុន្មានសប្តាហ៍ខាងមុខនេះ។
គួរបញ្ជាក់ថាមូលហេតុខាងលើនេះបាននាំអោយសាម៉ីខ្លួនក៏ដូចជាក្រុមមាន់គកបារំាងមានការព្រួយបារម្មណ៏ថា កីឡាករវ័យ២៩ ឆ្នាំរូបនេះអាចខកខានការប្រកួត World Cup ក្នុងរដូវរងារនេះ ប្រសិនជាPogbaចាំបាច់ត្រូវ ទទួលការវះកាត់នោះ។ទោះជាយ៉ាងណាហានិភ័យនោះត្រូវបានច្រានចោលបន្ទាប់ពី សមាជិកជ័យលាភីWorld Cup ២០១៨ បានជួបពិភាក្សាគ្នាជាមួយអ្នកឯកទេសវេជ្ជសាស្រ្តកាលពីថ្ងៃអង្គារម្សិលមិញនេះ។
គួររំលឹកថា Pogba បានសម្រេចចិត្តវិលត្រលប់មកចូលលរួមជាមួយ Juventus វិញនៅរដូវក្តៅនេះជាលើកទីពីរដោយគ្មានតម្លៃខ្លួន បន្ទាប់ពីកិច្ចសន្យារបស់គាត់ជាមួយ Manchester United បានផុតកំណត់។ប៉ុន្តែជាអកុសលPogba បានរងរបួសអំឡុងពេលហ្វឹកហាត់ក្នុងដំណើរទេសចរណ៍មុនរដូវកាលរបស់ក្លឹបនៅសហរដ្ឋអាមេរិក។ទោះបីជាបង្ហាញខ្លួនក្នុងការប្រកួតដំបូងអោយJuventus ទល់នឹងក្រុមម៉ិកស៊ិក Chivas Guadalajara កាលពីខែមុន ប៉ុន្តែPogbaបានជួបបញ្ហារបួសលើ ជង្គង់ស្តាំរបស់គាត់ក្រោយការប្រកួតនោះ។ យោងគេហទំព័រ La Gazzetta dello Sport បានចុះផ្សាយថាៈ Pogba ឥឡូវនេះនឹងទទួលការព្យាបាលនៅមូលដ្ឋាននៅក្នុងក្លឹបហាត់ប្រាណ និងអាងហែលទឹក ហើយទំនងជាត្រូវអវត្តមានរយៈពេល៥ សប្តាហ៍ខណៈ Juventus ចាប់ផ្តើមយុទ្ធនាការ Serie A របស់ពួកគេទល់នឹង Sassuolo នៅក្នុងផ្ទះនៅថ្ងៃច័ន្ទទី ១៥ ខែសីហាខាងមុខនេះ៕
ប្រភពព័ត៍មាន៖ BBC
