បរទេស៖ លោក Jose Mourinho អ្នកចាត់ការទូទៅរបស់ក្រុម Tottenham Hotspur បាននិយាយកាលពីថ្ងៃពុធថា Manchester United គឺជាក្រុមមួយក្នុងចំណោមក្រុមដែលមានក្តីសង្ឃឹមខ្ពស់ក្នុងការលើកពានក្របខ័ណ្ឌ Europa League ក្រោយពីការធ្លាក់ចេញពីក្របខ័ណ្ឌ Champions League របស់ពួកគេក្រោមស្នាដៃក្រុម RB Leipzig កាលពីថ្ងៃអង្គារ។
Man United បានត្រូវការត្រឹមតែលទ្ធផលស្មើប៉ុណ្នោះដើម្បីឈានទៅប្រកួតវគ្គ១៦ក្រុមចុងក្រោយ ប៉ុន្តែ បានជួបការខកចិត្តដោយសារតែការលេងមិនបានល្អនៅដើមតង់ និងបានរងបរាជ័យក្នុងលទ្ធផល ៣-២ ខណៈដែលលទ្ធផលនេះ បានធ្វើឲ្យពួកគេធ្លាក់ទៅឈរក្នុងចំណាត់ថ្នាក់លេខ៣ក្នុងពូល ដែលនាំឲ្យពួកគេត្រូវធ្លាក់ទៅប្រកួតក្នុងក្របខ័ណ្ឌលំដាប់ទី២របស់អឺរ៉ុបតែម្តង។ លោក Mourinho ដែលបានដឹកនាំឲ្យក្លិប Man United លើកពានក្របខ័ណ្ឌ Europa League កាលពីឆ្នាំ២០១៧នោះ បានប្រាប់អ្នកយកព័ត៌មាននៅមុនពេលក្រុមរបស់លោកប្រកួតលើទឹកដីខ្លួនឯងជាមួយនឹងក្រុម Antwerp នៅរាត្រីនេះ ថា៖ «ក្រុមដែលធ្លាក់មកពីក្របខ័ណ្ឌ Champions League សុទ្ធតែក្រុមខ្លាំង ហើយជាធម្មតា មិនស្ថិតក្នុងកម្រិតរបស់ Europa League ឡើយ»។
លោកបានបន្ថែមទៀតថា៖ «Man Utd ជាក្រុមមួយក្នុងចំណោមក្រុមកំពូល។ ក្រុមនេះ បានលេងយ៉ាងល្អពេលប៉ះក្រុម Paris St Germain និង Leipzig។ យើងបានដឹងថា វានឹងមិនងាយស្រួលសម្រាប់ក្រុមណាមួយឡើយ»៕
ប្រភពព័ត៌មាន៖ Channel News Asia
