បរទេស៖ ការធ្លាក់ចេញពីក្របខ័ណ្ឌ Champions League យ៉ាងឆាប់រហ័សរបស់ក្រុម Manchester United មានន័យថា តំណែងរបស់លោក Ole Gunnar Solskjaer ក៏ស្ថិតក្រោមការអង្កេតផងដែរ នៅមុនពេលការធ្វើដំណើររបស់ក្រុម Manchester City ទៅកាន់កីឡដ្ឋាន Old Trafford ក្នុងការប្រកួតមួយ ដែលក្រុមទាំង២មិនអាចចាញ់ដូចគ្នា។
ការប្រកួតរវាងក្រុមស្ថិតក្នុងទីក្រុង Manchester តែមួយនេះ គឺជាកម្មវិធីប្រកួតដ៏គួរឲ្យចាប់អារម្មណ៍បំផុត ក្នុងចំណោមការប្រកួតក្របខ័ណ្ឌ Premier League នៅចុងសប្តាហ៍នេះ ខណៈដែលក្រុម Tottenham ដែលកំពុងតែមានពិន្ទុនាំមុខ នឹងធ្វើដំណើរទៅកាន់ទឹកដីក្រុម Crystal Palace ហើយក្រុម Fulham ជួបក្រុមម្ចាស់ជើងឯក Liverpool។ ទាំង Man United និង Man City សុទ្ធសឹងទើបតែបានវិលទៅរកភាពខ្លាំងវិញ ក្រោយពីជួបភាពត្រដាបត្រដួសនៅដើមរដូវកាលនេះ។ ក្រោយពីដណ្តើមបានជ័យជម្នះក្នុងការប្រកួតលីក៤លើកជាប់ៗគ្នា ក្រុមរបស់លោក Solskjaer អាចនឹងស្ថិតក្នុងការប្រជែងរកការឈ្នះពានក្របខ័ណ្ឌលីកជាលើកទី១ បើគិតចាប់តាំងពីការចូលនិវត្តន៍របស់លោក Alex Ferguson ក្នុងឆ្នាំ២០១៣ បានធ្វើឲ្យក្រុមបិសាចក្រហម ធ្លាក់ចុះទម្រង់លេងជាបន្តបន្ទាប់។
ប៉ុន្តែ ជាមួយនឹងការមានលទ្ធផលមិនទៀងទាត់ រួមជាមួយនឹងការធ្លាក់ចេញពីក្របខ័ណ្ឌ Champions League ក្រោយពីចាញ់ក្រុម RB Leipzig ៣-២ កាលពីពាក់កណ្តាលសប្តាហ៍ មានន័យថា សម្ពាធផ្សេងៗកំពុងតែធ្លាក់ទៅលើលោក Solskjaer។ ការចាញ់ជាលើកទី៤ ក្នុងចំណោមការប្រកួត៤លើកក្នុង Premier League នាកីឡដ្ឋាន Old Trafford នៅរដូវកាលនេះ អាចនឹងធ្វើឲ្យ Man Utd បញ្ចប់ចុងសប្តាហ៍នេះ ដោយមាន៨ពិន្ទុតាមពីក្រោយក្រុមឈរលេខ១ បើទោះបីនៅសល់១ប្រកួតក្នុងដៃក៏ដោយ៕
ប្រភពព័ត៌មាន៖ Channel News Asia
