បរទេស៖ Arsenal បានរងបរាជ័យក្នុងការប្រកួតលីកជាលើទឹកដីខ្លួនឯងជាលើកទី៤ជាប់ៗគ្នា ជាលើកដំបូង បើគិតចាប់តាំងពីឆ្នាំ១៩៥៩ ក្រោយពីការធ្វើឲ្យបាល់ចូលទីខ្លួនឯងរបស់ខ្សែប្រយុទ្ធ Pierre-Emerick Aubameyang បានជួយឲ្យក្រុម Burnley ទទួលជ័យជម្នះ ១-០ កាលពីថ្ងៃអាទិត្យ។
ក្រុមកាំភ្លើងធំមួយនេះ បានជួបបញ្ហាលើវិន័យម្តទៀត ខណៈដែលការរងពិន័យកាតក្រហមដែលមិនចាំបាច់របស់ Granit Xhaka នៅមុនពេលនាទី ទី៦០ បានធ្វើឲ្យក្រុម Burnley មានប្រៀបវិញតែម្តង។ Aubameyang នៅតែរង់ចាំគ្រាប់បាល់ក្នុងលីកជាលើកទី១របស់ខ្លួន ពីការប្រកួតបើកចំហរមួយ បើគិតចាប់តាំងពីបានបន្តកិច្ចសន្យាថ្មីរយៈពេល៣ឆ្នាំ កាលពីខែកញ្ញា ប៉ុន្តែ បានរកគ្រាប់បាល់បំប៉ោងសំណាញ់ទីខ្លួនឯងទៅវិញ នៅពេលដែលរូបគេព្យាយាមស៊ុតបាល់ចេញពីការបញ្ជូនបាល់ចេញពីជម្រុងរបស់កីឡាករ Ashley Westwood នៅរយៈពេល១៧នាទីចុងក្រោយ។ ការដណ្តើមបានជ័យជម្នះនេះ ជួយឲ្យក្រុម Burnley គេចផុតពីតំបន់កាត់ចោល ស្របពេលដែលក្រុម Arsenal កាន់តែធ្លាក់ក្បែរតំបន់កាត់ចោល ខណៈដែលពួកគេស្ថិតក្នុងចំណាត់ថ្នាក់លេខ១៥ នាំមុខត្រឹមតែ៥ពិន្ទុប៉ុណ្ណោះពីលើក្រុមស្ថិតនៅបាតតារាងទាំង៣។
លោក Mikel Arteta គ្រូបង្វឹករបស់ក្រុម Arsenal បានឲ្យដឹងថា៖ «យើងត្រូវតែស៊ុតបាល់បញ្ចូលទី ដែលនោះគឺជាចំណុចដែលយើងធ្វើមិនទាន់បាន។ អ្វីដែលយើធ្វើបាន និងអ្វីដែលក្រុម Burnley បានធ្វើ មិនអាចប្រៀបធៀបគ្នាបានឡើយ»៕
ប្រភពព័ត៌មាន៖ Channel News Asia
