បរទេស៖ Lionel Messi នឹងចាកចេញពី Barcelona ក្រោមមូលហេតុតែមួយគត់គឺរូបគេមិនទទួលយកការកាត់ប្រាក់ខែ យោងតាមបេក្ខជនប្រធានក្លឹបថ្មីលោក Emili Rousaud ដែលកំពុងឈរឈ្មោះត្រៀមធ្វើការបោះឆ្នោតនៅថ្ងៃទី ២៤មករាក្រោយការលាលែងរបស់អតីតប្រធានក្លឹបលោក Josep Maria Bartomeu។ អនាគតរបស់ Messi នៅតែជាប្រធានបទដ៏សំខាន់សម្រាប់ក្រុមអ្នកមានបុណ្យ Barcelona បន្ទាប់ពីប្រធានក្រុម រូបនេះបានភ្ជាប់ ទំនាក់ទំនងក្នុងការចាកចេញពីក្លឹបកាលពីដើមរដូវកាលនេះ។
ម្ចាស់ពានកីឡាករលេងល្អបំផុតរបស់ពិភពលោកគឺបាល់មាស (Ballon d’Or) ៦សម័យមានទំនាក់ទំនង ក្នុង ការ ផ្លាស់ទៅលេងនៅក្លឹប Manchester City ខ្លាំងបំផុតមុនពេលសំរេចចិត្តបន្តលេងនៅលីកកំពូល La Liga ខណៈ Paris Saint-Germain និង Inter Milan ក៏ត្រូវបានបញ្ជាក់ពីការចាប់អារម្មណ៏ផ្ទេរយកកីឡាករវ័យ៣៣ ឆ្នាំ រូបនេះផងដែរ។
Rousaud បានបញ្ជាក់ប្រាប់យ៉ាងដូច្នេះថា៖ “Messi បានចារឈ្មោះអស្ចារ្យបំផុតនៅក្នុងប្រវត្តិសាស្ត្ររបស់ក្លឹប។ យើងត្រូវតែគោរពកេរ្តិ៍តំណែលរបស់គាត់។ យ៉ាងណាមិញយើងនឹងខិតខំប្រឹងប្រែងដើម្បីធានាអោយរូបគាត់បន្តនៅជាមួយក្លឹបប៉ុន្តែយើងក៏ត្រូវគិតពីផលប្រយោជន៍ក្លឹបជាមុនសិន”៕
