បរទេស៖ លោក Jurgen Klopp គ្រូបង្វឹករបស់ក្លិប Liverpool បានទទួលស្គាល់កាលពីថ្ងៃអង្គារថា លោកពិតជាចាប់អារម្មណ៍ទៅមធ្យោបាយដែលលោក Jose Mourinho បានស្តារមុខមាត់ពីភាពវេទនាក្នុងពេលដឹកនាំក្លិប Manchester United ដើម្បីផ្លាស់ប្តូរក្រុម Tottenham ឲ្យទៅជាបេក្ខភាពប្រជែងដណ្តើមពាន។
លោក Klopp នឹងត្រូវបង្ហាញពីទេពកោសល្យដឹកនាំរបស់លោកនៅពេលពេលប៉ះជាមួយនឹងក្រុមរបស់លោក Mourinho នៅរាត្រីនេះ នៅពេលដែលក្រុម Spurs ដែលកំពុងតែនាំមុខលើតារាង Premier League ធ្វើដំណើរទៅកាន់ក្រុមឈរលេខ២ Liverpool នៅក្នុងការប្រកួតដ៏រំភើបមួយ។ រយៈពេល២ឆ្នាំ ក្រោយពីក្រុម Liverpool ផ្តួលក្រុម Man United ដើម្បីបញ្ចប់ពេលវេលាដ៏ខកចិត្តរបស់លោក Mourinho នៅកីឡដ្ឋាន Old Trafford គ្រូបង្វឹកសញ្ជាតិព័រទុយហ្គាល់រូបនេះ ហាក់ដូចជារកឃើញភាពខ្លាំងរបស់លោកត្រឡប់មកវិញហើយ។ សមត្ថភាពរបស់លោក Mourinho ក្នុងការផ្លាស់ប្តូរធ្វើឲ្យក្រុម Tottenham ក្លាយជាក្រុមប្រជែងដណ្តើមពាន ក្នុងរយៈពេល១ឆ្នាំ ក្រោយពីចូលជំនួសកន្លែងរបស់លោក Mauricio Pochettino បានផ្តល់ការចាប់អារម្មណ៍ដល់លោក Klopp។ អ្នកធិប្បាយជាច្រើន បានលើកឡើងថា ក្រុម Liverpool ដែលជាម្ចាស់ជើងឯក Champions League ២សម័យកាល គឺជាដើមហេតុមួយ ក្រោយពីការរងការណ្តេញចេញរបស់លោកពីក្លិប Man United ប៉ុន្តែ លោក Klopp មិនដែលមើលស្រាលលើអតីតគ្រូបង្វឹករបស់ក្លិប Chelsea, Real Madrid, Inter Milan និង Porto រូបនេះឡើយ។
លោក Klopp បានប្រាប់អ្នកយកព័ត៌មានថា៖ «ខ្ញុំមិនភ្ញាក់ផ្អើលឡើយ ពីព្រោះនេះគឺជាពិភពលោកដែលយើងរស់នៅ។ ខ្ញុំគិតថា គាត់ក៏មិនភ្ញាក់ផ្អើលដូចគ្នា ប៉ុន្តែ គាត់បានបង្ហាញថា គាត់បានវិលមកវិញហើយ។ ប្រសិនបើគាត់វិលត្រឡប់មកវិញហើយ នោះគឺជាការបង្ហាញពីទេពកោសល្យ។ ពិតជាចាប់អារម្មណ៍ណាស់»៕
ប្រភពព័ត៌មាន៖ Channel News Asia
