បរទេស៖ លោក Frank Lampard បានចោទសួរលើស្មារតីប្រកួតរបស់កីឡាករខ្លួន ក្រោយពី Chelsea បានបាត់បង់ឱកាសក្នុងការឡើទៅឈរលើកំពូលតារាងនៃក្របខ័ណ្ឌ Premier League បានតាមរយៈការរងបរាជ័យជាលើកទី២ជាប់ៗគ្នា ក្នុងលទ្ធផល ២-១ លើទឹកដីក្រុម Wolves កាលពីថ្ងៃអង្គារ។
បើទោះបីពួកគេមិនបានលេងល្អក៏ដោយ ប៉ុន្តែ ក្រុម Chelsea បានធ្វើឲ្យខ្លួនឯងស្ថិតលើផ្លូវនៃជ័យជម្នះ នៅលើទឹកដីក្រុម Wolves នៅពេលដែលខ្សែប្រយុទ្ធ Olivier Giroud បានស៊ុតបាល់បំប៉ោងសំណាញ់ទីនៅដើមតង់ទី២។ កីឡាករ Daniel Podence បានរកគ្រាប់បាល់តាមស្មើវិញ នៅមុនពេលកីឡាករ Pedro Neto បានរកគ្រាប់បាល់ឈ្នះនៅជិតបញ្ចប់ការប្រកួត។ លោក Lampard បាននិយាយថា៖ «យើងគួរតែបានបញ្ចប់ការប្រកួតនេះ។ ប្រសិនបើអ្នកលេងមិនល្អទេនោះ យើងគួរតែរង់ចាំមើលឱកាស ដោយមិនត្រូវឲ្យមានការវាយសម្រុករហ័សឡើយ»។
លោកបានបង្ហើបថា កីឡាកររបស់ Chelsea មួយចំនួនមានការជឿជាក់លើខ្លួនឯងពេក ក្រោយពីមិនស្គាល់ចាញ់សោះពីការប្រកួត១៤លើកជាប់ៗគ្នា នៅមុនពេលការរងបរាជ័យកាលពីថ្ងៃសៅរ៍ លើទឹកដីក្រុម Everton និងបានណែនាំឲ្យកីឡាករទាំងនោះ ស្តារមុខមាត់ឡើវិញ នៅមុនពេលការប្រកួតនៅថ្ងៃចន្ទជាមួយនឹងក្រុម West Ham។ គ្រូបង្វឹករូបនេះបានបន្ថែមថា៖ «កីឡាករប្រហែលគិតបែបនោះ។ នេះគឺជា Premier League ប្រសិនបើអ្នកលេងមិនបានល្អ អ្នកចាញ់ការប្រកួត»៕
ប្រភពព័ត៌មាន៖ The Guardian