បរទេស៖ ខ្សែប្រយុទ្ធ Robert Lewandowski របស់ក្លិប Bayern Munich បានជាប់ជាកីឡាករឆ្នើមបំផុតប្រចាំឆ្នាំ២០២០របស់សហព័ន្ធកីឡាបាល់ទាត់អន្តរជាតិហៅកាត់ថា FIFA កាលពីថ្ងៃព្រហស្បតិ៍ ក្រោយពីបានផ្តួលម្ចាស់ពានកាលពីឆ្នាំមុន Lionel Messi និងតារាឆ្នើម Cristiano Ronaldo។
Lewandowski ដែលបានឈ្នះពានលីកអាល្លឺម៉ង់ និងពានក្នុងស្រុកមួយទៀត ក៏ដូចជាពានក្របខ័ណ្ឌ Champions League ក្នុងរដូវកាលតែមួយជាមួយនឹងក្លិប Bayern នោះ បានបញ្ចប់ក្នុងនាមជាអ្នករកបានគ្រាប់បាល់ច្រើនជាងក្នុងរាល់យុទ្ធនាការទាំង៣ និងបានឈ្នះពានរង្វាន់នេះជាលើកដំបូង។ ខ្សែប្រយុទ្ធវ័យ៣២ឆ្នាំរូបនេះ ក៏បានជួយឲ្យក្រុមបាល់ទាត់ជម្រើសជាតិប៉ូឡូញ ឈ្នះកៅអីទៅលេងក្នុងព្រឹត្តិការណ៍ Euro ឆ្នាំ២០២០ និងជាប់ជាកីឡាករឆ្នើមប្រចាំឆ្នាំ២០១៩-២០២០ របស់សហព័ន្ធកីឡាបាល់ទាត់ទ្វីបអឺរ៉ុប (UEFA) កាលពីខែតុលាផងដែរ។ Lewandowski បានឲ្យដឹថា៖ «ការឈ្នះពានរង្វាន់បែបនេះ និងចែករំលែកពាននេះ ជាមួយនឹងម្ចាស់ពានឆ្នាំមុន Messi និង Ronaldo គឺជារឿងដែលមិនគួរឲ្យជឿ និងមានន័យខ្លាំងណាស់ចំពោះខ្ញុំ។ ខ្ញុំពិតជាមានមោទនភាព និងរីករាយ។
នេះគឺជាថ្ងៃដ៏អស្ចារ្យមួយសម្រាប់ខ្ញុំ ហើយក៏សម្រាប់ក្លិប និងមិត្តរួមអាជីពរបស់ខ្ញុំផងដែរ»។ ជាមួយគ្នានេះ ខ្សែការពារ Lucy Bronze របស់ក្លិប Manchester City បានឈ្នះពានកីឡាការិនីឆ្នើមបំផុតប្រចាំឆ្នាំ ដើម្បីក្លាយជាស្ត្រីដំបូងគេក្នុងការឈ្នះពានរង្វាន់នេះ៕
ប្រភពព័ត៌មាន៖ Channel News Asia
