បរទេស៖ ក្លិប Barcelona កំពុងតែសង្ឃឹមថា «នឹងទទួលបានចម្លើយវិជ្ជមាន» ពីក្លិប Bayern Munich ក្រោយពីបានដាក់សំណើដើម្បីទិញខ្សែប្រយុទ្ធអន្តរជាតិប៉ូឡូញ Robert Lewandowski។ នេះបើយោងទៅតាមការបញ្ជាក់របស់ប្រធានក្លិបលោក Joan Laporta កាលពីថ្ងៃព្រហស្បតិ៍។ អំឡុងពេលនៃការបង្ហាញខ្លួនរបស់កីឡាករចំណូលថ្មី Andreas Christensen លោក Laporta បាននិយាយថា៖ «យើងបានដាក់សំណើមួយសម្រាប់កីឡាកររូបនេះ។
យើងកំពុងរង់ចាំចម្លើយ ហើយយើងនឹងរង់ចាំមើលថា វាមានវិជ្ជមាន ឬអត់»។ ក្លិប Bayern បានបញ្ជាក់កាលពីមុនថា Lewandowski ដែលបានបញ្ជាក់ពីបំណងរបស់គេក្នុងការចាកចេញពីក្រុមម្ចាស់ជើងឯកអាល្លឺម៉ង់មួយនេះ ត្រូវតែបំពេញកិច្ចសន្យារបស់គេដែលបន្តរហូតដល់ខែមិថុនា ឆ្នាំ២០២៣។ លោក Laporta បានឲ្យដឹងថា៖ «យើងសូមថ្លែងអំណរគុណដល់ Lewandowski សម្រាប់រាល់ការបង្ហាញទាំងអស់ដែលរូបគេបានធ្វើដើម្បីបង្ហាញថា រូបគេចង់មកចូលរួមជាមួយនឹងយើង»។
ខ្សែប្រយុទ្ធវ័យ៣៣ឆ្នាំរូបនេះ ដែលជាប់ជាកីឡាករឆ្នើមបំផុតរបស់ FIFA ចំនួន២លើក បានស៊ុតបាល់បញ្ចូលទី២៣៩៨គ្រាប់ ក្នុងក្របខ័ណ្ឌ Bundesliga ក្នុងការបង្ហាញខ្លួន២៥២លើក ក្នុងរយៈពេល៨ឆ្នាំសម្រាប់ក្លិប Bayern។ កាលពីចុងខែមិថុនា បណ្តាញសារព័ត៌មានអាល្លឺម៉ង់ បានបង្ហាញថា Barca បានដាក់សំណើក្នុងទឹកប្រាក់ចំនួន៤០លានអឺរ៉ូ (ស្មើនឹង៤១លានដុល្លារអាមេរិក) បូករួមទាំងប្រាក់ឧបត្ថម្ភនានាចំនួន៥លានអឺរ៉ូផ្សេងទៀត៕
ប្រភពព័ត៌មាន៖ Channel News Asia
