បរទេស៖ Kai Rooney ដែលជាកូនប្រុសរបស់អតីតខ្សែប្រយុទ្ធដ៏ឆ្នើម Wayne Rooney បានដើរតាមជំហានឪពុករបស់ខ្លួន តាមរយៈការចុះហត្ថលេខាលេងឲ្យក្លិប Manchester United។ អតីតតារាឆ្នើមដែលរកបានគ្រាប់បាល់ច្រើនជាងគេរបស់ Man United រូបនេះ បានបង្ហោះរូបថតមួយនៅលើបណ្តាញសង្គម ក្នុងពេលកូនប្រុសវ័យ១១ឆ្នាំរបស់គេ ដែលជាកូនច្បងក្នុងចំណោមកូនប្រុសទាំង៤នាក់របស់ Rooney កំពុងតែចុះហត្ថលេខាលើកិច្ចសន្យាមួយជាមួយនឹងអតីតក្លិបរបស់ឪពុកខ្លួន។
Rooney បានសរសើរចំណងជើងនៅជាប់រូបនោះថា៖ «ថ្ងៃដ៏មានមោទនភាព។ Kai កំពុងតែចុះហត្ថលេខាឲ្យក្លិប @manchesterunited។ សូមរក្សាការខិតខំប្រឹងប្រែងកូនសម្លាញ់»។ Rooney វ័យ៣៨ឆ្នាំ ដែលបច្ចុប្បន្នកំពុងតែធ្វើជាគ្រូបង្វឹកបណ្តោះអាសន្ននៅក្នុងក្លិប Derby របស់ក្របខ័ណ្ឌ Championship បានចូលរួមជាមួយនឹងក្លិប Man United ពីក្លិប Everton កាលពីឆ្នា២០០៤ ក្នុនាមជាកីឡាករយុវជន។ អតីតខ្សែប្រយុទ្ធអន្តរជាតិអង់គ្លេសរូបនេះ បានជួបអាជីពដ៏ត្រចះត្រចង់រយៈពេល១៣ឆ្នាំនៅ Old Trafford ដោយបានស៊ុតបាល់បញ្ចូលទី២៥៣គ្រាប់ ក្នុងការបង្ហាញខ្លួន៥៥៩លើក និងបានបំបែកកំណត់ត្រានៃការរកគ្រាប់បាល់របស់ Bobby Charlton កាលពីខែមករា ឆ្នាំ២០១៧។
អ្នកស្រី Coleen Rooney ដែលជាភរិយារបស់ Wayne Rooney បានសរសេរលើបណ្តាញសង្គម Instagram ថា៖ «រាត្រីដ៏ពិសេស….. សូមអបអរសាទរដល់ Kai។ ម៉ាក់ស្រឡាញ់កូន ហើយម៉ាក់ពិតជាមានមោទនភាពដោយសារតែកូន។ សូមរក្សាការប្រឹងឲ្យអស់ពីសមត្ថភាព»៕
ប្រភពព័ត៌មាន៖ Channel News Asia
