បរទេស៖ ក្រុមឈរលេខ២ Bayern Munich កំពុងតែស្រេកឃ្លានក្នុងការបង្ហាញពីភាពខ្លាំងរបស់ខ្លួន ក្នុងក្របខ័ណ្ឌ Bundesliga តាមរយៈការដណ្តើមបានជ័យជម្នះនៅលើទឹកដីក្រុមកំពុងមានពិន្ទុនាំមុខ Bayer Leverkusen នៅថ្ងៃសៅរ៍ ក្នុងការប្រកួតរវាងក្រុមស្ថិតក្នុងចំណាត់ថ្នាក់កំពូលតារាងដូចគ្នា នៅរដូវកាលនេះ។
ក្រោមការដឹកនាំរបស់លោកគ្រូបង្វឹកសញ្ជាតិហូឡង់ Peter Bosz ក្រុម Leverkusen គឺជាក្រុមតែមួយដែលនៅតែមិនស្គាល់ចាញ់សោះក្នុងការប្រកួតក្របខ័ណ្ឌលីកនៅរដូវកាលនេះ។ ពួកគេកំពុងតែមាន១ពិន្ទុលើក្រុម Bayern ក្រោយពីបានយកឈ្នះលើក្រុម Cologne ក្នុងលទ្ធផល ៤-០ កាលពីថ្ងៃពុធ។ ផ្ទុយទៅវិញ ក្រុម Bayern ត្រូវការគ្រាប់បាល់ស៊ុតបញ្ចូលទី២គ្រាប់ពីខ្សែប្រយុទ្ធ Robert Lewandowski និងការសង្គ្រោះបាល់យ៉ាងល្អរបស់អ្នកចាំទី Manuel Neuer ដើម្បីផ្តួលក្រុម Wolfsburg ទាំងប្រផិតប្រផើយក្នុងលទ្ធផល ២-១ កាលពីពាក់កណ្តាលសប្តាហ៍នេះ ក្រោយពីបានបញ្ចប់ក្នុងលទ្ធផលស្មើពីការប្រកួតទាំង២លើកដំបូងរបស់ខ្លួន។ បញ្ហារបួសកីឡាករ និងកម្មវិធីប្រកួតដ៏មមាញឹក បានកើតឡើងជាបន្តបន្ទាប់លើក្រុម Bayern ដែលហាក់ដូចជាទន់ខ្សោយក្នុងរយៈពេលប៉ុន្មានសប្តាហ៍ចុងក្រោយនេះ។
Lewandowski ដែលទើបងតែបានឈ្នះពានកីឡាករឆ្នើមប្រចាំឆ្នាំរបស់ FIFA កាលពីថ្ងៃព្រហស្បតិ៍ បាននិយាយថា ការប្រកួតនៅថ្ងៃសៅរ៍ នឹងផ្តល់ឱកាសឲ្យក្រុម Bayern ក្នុងការជម្នះលើបញ្ហាអស់កម្លាំងរបស់ខ្លួន នៅក្នុងការប្រកួតលីកចុងក្រោយនៃឆ្នាំ២០២០របស់ពួកគេ នៅមុនពេលឈានដល់ការសម្រាករយៈពេល២សប្តាហ៍ នារដូវរងា៕
ប្រភពព័ត៌មាន៖ Channel News Asia
