បរទេស៖ ក្រុម Manchester City បានបន្ថែមសម្ពាធទៅលើលោក Mikel Arteta នៅពេលដែលក្រុមម្ចាស់ការពារតំណែងជើឯកពាន League Cup មួយនេះ បានឈានទៅវគ្គពាក់កណ្តាលផ្តាច់ព្រ័ត្រ តាមរយៈការយកឈ្នះលើក្រុម Arsenal ក្នុងលទ្ធផល ៤-១ កាលពីថ្ងៃអង្គារ។
Man City បានធ្វើឲ្យលោក Arteta គ្រូបង្វឹករបស់ក្រុម Arsenal លិចលង់ក្នុងសម្ពាធកាន់តែជ្រៅនៃអំឡុងរដូវបុណ្យណូអែល តាមរយៈការធ្វើឲ្យក្រុមរបស់លោករងបរាជ័យជាលើកទី៤ក្នុងចំណោមការប្រកួត៦លើកចុងក្រោយរបស់ពួកគេ ក្នុងរាល់យុទ្ធនាការទាំងអស់។ ខ្សែប្រយុទ្ធ Gabriel Jesus បានចំណាយពេលត្រឹមតែ៣នាទីប៉ុណ្ណោះ ដើម្បីជួយឲ្យក្រុម Man City រកបានគ្រាប់បាល់នាំមុខមុន នាកីឡដ្ឋាន Emirates ហើយបើទោះបីខ្សែប្រយុទ្ធ Alexandre Lacazette បានរកគ្រាប់បាល់តាមស្មើក៏ដោយ ប៉ុន្តែ លោក Arteta នៅតែជួបរាត្រីដ៏សោកសៅមួយផ្សេងទៀត។ អ្នកចាំបម្រុង Alex Runarsson របស់ក្លិប Arsenal បានធ្វើឲ្យមានកំហុស នៅពេលដែលរូបគេបានធ្វើឲ្យបាល់ស៊ុតពិន័យ Free-kick របស់ Riyad Mahrez ចូលក្នុងសំណាញ់ទីដ៏ងាយស្រួល។
កីឡាករ Phil Foden និង Aymeric Laporte បានបំពេញការឈឺចាប់សម្រាប់ក្រុម Arsenal តាមរយៈការរកបានគ្រាប់បាល់ទី៣ និងទី៤សម្រាប់ក្រុមខ្លួន។ ឈរក្នុងចំណាត់ថ្នាក់លេខ១៥ នៅលើតារាងក្របខ័ណ្ឌ Premier League ក្រោយពីចាញ់៥លើកក្នុងចំណោមការប្រកួត៧លើកចុងក្រោយ ដែលជាកំណត់ត្រាដ៏អន់បំផុតរបស់ពួកគេនៅដើមរដូវកាលមួយ បើគិតចាប់តាំងពីរដូវកាលឆ្នាំ១៩៧៤-១៩៧៥ ក្រុម Arsenal កំពុងតែស្ថិតក្នុងវិបត្តិយ៉ាងពិតប្រាកដ៕
ប្រភពព័ត៌មាន៖ Channel News Asia
