បរទេស៖ ក្រុម Middlesbrough បានបង្កើតឲ្យមានការភ្ញាក់ផ្អើលមួយផ្សេងទៀតក្នុងការប្រកួតពាន FA Cup ដើម្បីធ្វើឲ្យ Tottenham បន្តរង់ចាំសម្រាប់ការឈ្នះពានជាលើកដំបូងរបស់ខ្លួន ក្រោយពីបានយកឈ្នះក្នុងលទ្ធផល ១-០ បន្ទាប់ពីនាទីបន្ថែម១៥នាទី២ដង នាកីឡដ្ឋាន Riverside កាលពីថ្ងៃអង្គារ ស្របពេលដែល Manchester City ឈានទៅវគ្គ៨ក្រុមចុងក្រោយដោយងាយ តាមរយៈការយកឈ្នះ ២-០ លើទឹកដីក្រុម Peterborough។
Middlesbrough បានទម្លាក់ក្រុម Manchester United នៅកីឡដ្ឋាន Old Trafford ក្នុងការប្រកួតជុំទី៤ ហើយក្រុមស្ថិតក្នុងក្របខ័ណ្ឌ Championship បានទទួលជ័យជម្នះយ៉ាងស័ក្តសម ដើម្បីធ្វើឲ្យ Spurs ជួបរដូវកាលដែលមិនឈ្នះពានមួយផ្សេងទៀត។
Tottenham មិនធ្លាប់ឈ្នះពានសោះ បើគិតចាប់តាំងពីបានឈ្នះពាន League Cup ក្នុងឆ្នាំ២០០៨ ហើយការរងបរាជ័យដ៏ខកចិត្តមួយផ្សេងទៀត បង្កើតឲ្យមានសំណួរជាច្រើនបន្ថែមទៀត ជុំវិញអនាគតរបស់លោកគ្រូបង្វឹក Antonio Conte។
គ្រូបង្វឹកសញ្ជាតិអ៊ីតាលីរូបនេះ បានចូលកាន់តំណែងកាលពីខែវិច្ឆិកា ប៉ុន្តែបានបង្ហើបរួចជាស្រេចថា លោកអាចនឹងចាកចេញ ក្រោយពីការរងបរាជ័យ៤លើក ក្នុងចំណោមការប្រកួតក្របខ័ណ្ឌ Premier League ៦លើក៕
ប្រភពព័ត៌មាន៖ Channel News Asia