បរទេស៖ ក្រុម Manchester United នឹងត្រូវប៉ះជាមួយនឹងក្រុមស្ថិតក្នុទីក្រុងតែមួយ Manchester City ក្នុងការប្រកួតពាន League Cup វគ្គពាក់កណ្តាលផ្តាច់ព្រ័ត្រ ក្រោយពីដណ្តើមបានជ័យជម្នះក្នុងលទ្ធផល ២-០ លើទឹកដីក្រុម Everton ស្របពេលដែលក្រុម Tottenham ក៏បានឈានទៅវគ្គ៤ក្រុមចុងក្រោយផងដែរ ក្រោយពីបានយកឈ្នះលើក្រុម Stoke ៣-១ កាលពីថ្ងៃពុធ។
Man United បានគ្រប់គ្រងការប្រកួតក្នុងវគ្គ៨ក្រុមចុងក្រោយរបស់ខ្លួនស្ទើរតែទាំងស្រុងនាកីឡដ្ឋាន Goodison Park ប៉ុន្តែពួកគេបានចំណាយពេលរហូតដល់នាទី ទី៨៨ ទើបខ្សែប្រយុទ្ធ Edinson Cavani រកបានគ្រាប់បាល់បំប៉ោងសំណាញ់ទី។ គ្រាប់បាល់ទី៤របស់អតីតតារាឆ្នើមរបស់ក្លិប Paris Saint-Germain រូបនេះ សម្រាប់ក្លិប Man United បើគិតចាប់តាំងពីបានចូលរួមដោយគ្មានតម្លៃខ្លួន កាលពីខែតុលា បានកើតឡើងនៅលើទីលានដូចគ្នាដែលរូបគេបានរកគ្រាប់បាល់បើកឆាកឲ្យក្លិបរបស់គេកាលពីខែមុន។ ខ្សែប្រយុទ្ធ Anthony Martial បានរកគ្រាប់បាល់ទី២របស់ Man United នៅជិតបញ្ចប់ការប្រកួត។
លោក Ole Gunnar Solskjaer អ្នកចាត់ការទូទៅរបស់ Man United បានឲ្យដឹងថា៖ «គ្រាប់បាល់ស៊ុតបញ្ចូលទីរបស់ Cavani មិនអន់ឡើយ។ រូបគេជាខ្សែប្រយុទ្ធពោរពេញដោយសមត្ថភាព។ យើងដឹងថា នៅពេលដែលយើងការពារបានល្អ យើងត្រូវមានកីឡាករឆ្នើមៗដើម្បីឈ្នះក្នុងការប្រកួត»៕
ប្រភពព័ត៌មាន៖ Channel News Asia
