បរទេស៖ កីឡាករវ័យក្មេង Timothee Pembele របស់ក្រុម Paris St-Germain បានរកគ្រាប់បាល់បញ្ចូលទីជាលើកដំបូងរបស់គេសម្រាប់ក្លិបនេះ ខណៈដែលពួកគេបានផ្តួលក្រុម Strasbourg យ៉ាងចាស់ដៃក្នុងលទ្ធផល ៤-០ ដើម្បីរក្សាល្បឿនដេញតាមពីក្រោយក្រុមកំពូលតារាង កាលពីថ្ងៃពុធ។
ស្របពេលជាមួយគ្នានេះ ក្រុម Lyon បានផ្តួលក្រុម ក្រុម Nantes យ៉ាងងាយក្នុងលទ្ធផល ៣-០ ដើម្បីឡើងឈរពីលើក្រុម Lille នៅលើកំពូលតារាងនៃក្របខ័ណ្ឌ Ligue 1 មុននឹងឈានទៅកាន់ការសម្រាកនារដូវរងា។ ក្រុម Lyon របស់លោក Rudi Garcia ឡើងឈរពីលើក្រុម Lille តាមរយៈការរកបានគ្រាប់បាល់ច្រើនជាង ខណៈដែលក្រុមម្ចាស់ការពារតំណែងជើងឯក Paris Saint-Germain ដេញតាមពីក្រោយ១ពិន្ទុ ក្រោយពីបានផ្តួលក្រុម Strasbourg ៤-០ នាកីឡដ្ឋាន Parc des Princes។ Lyon បានឡើងឈរពីលើក្រុម Lille នៅលើកំពូលតារាង ក្រោយពីបានបង្ហាញពីកម្រិតលេយ៉ាងល្អនៅតង់ទី១ ពេលប្រកួតជាមួយនឹងក្រុម Nantes។
ដោយឡែក លោក Thomas Tuchel គ្រូបង្វឹករបស់ក្រុម PSG បានផ្លាស់ប្តូរកីឡាករដល់ទៅ៥នាក់ពីក្រុមដែលបានបញ្ចប់ក្នុងលទ្ធផលស្មើ ០-០ ជាមួយនឹងក្រុម Lille កាលពីចុងសប្តាហ៍ថ្មីៗនេះ ខណៈដែល Kylian Mbappe បានចូលលេងក្នុងជម្រើសដំបូង ក្រោយពីបានជាសះស្បើយពីរបួសសាច់ដុំ៕
ប្រភពព័ត៌មាន៖ BBC