បរទេស៖ ក្លិប Paris Saint-Germain បានបណ្តេញលោកគ្រូបង្វឹក Thomas Tuchel ចេញពីតំណែង ខណៈដែលអតីតខ្សែការពាររបស់ក្លិបនេះ និងជាអតីតគ្រូបង្វឹករបស់ក្លិប Tottenham លោក Mauricio Pochettino បានជាប់ជាបេក្ខភាពដែលត្រូវចូលជំនួស។
នេះបើយោងទៅតាមការចេញផ្សាយរបស់បណ្តាញសារព័ត៌មាននានា កាលពីថ្ងៃព្រហស្បតិ៍។ ក្រុមម្ចាស់ជើងឯករបស់បារាំងមួយនេះ បានបដិសេធក្នុងការធ្វើការបកស្រាយ នៅពេលដែលត្រូវបានចោទសួរដោយបណ្តាញសារព័ត៌មាន ដើម្បីបញ្ជាក់ពីការបណ្តេញចេញនេះដូចការចេញផ្សាយដោយកាសែត L’Equipe បណ្តាញផ្សព្វផ្សាយ RMC និងកាសែតអាល្លឺម៉ង់ Bild។ នៅពេលដែលត្រូវចោទសួរថា ព័ត៌មាននៃការបណ្តេញចេញនេះ ពិតឬអត់ អ្នកនាំពាក្យម្នាក់របស់ក្លិបបានឆ្លើយតបវិញថា៖ «មិនដឹងឡើយ។ យើងមិនស្ថិតក្នុងដំណាក់កាលក្នុងការធ្វើការបកស្រាយទៅលើប្រធានបទនេះឡើយ»។ លោក Pochettino ដែលបានចំណាយពេល២ឆ្នាំកន្លះក្នុងនាមជាកីឡាកររបស់ក្លិប PSG អាចនឹងចូលដឹកនាំវគ្គហ្វឹកហាត់ជាលើកដំបូងរបស់យើង នៅថ្ងៃទី៣ ខែមករា ក្រោយពីការសម្រាកនារដូវរងា។
លោក Tuchel វ័យ៤៧ឆ្នាំ បានចូលរួមជាមួយនឹងក្លិប PSG ក្នុងកិច្ចសន្យារយៈពេល២ឆ្នាំ កាលពីឆ្នាំ២០១៨ នងិបានដឹកនាំឲ្យក្លិបមានមូលដ្ឋាននៅ Parc des Princes ឈានទៅប្រកួតក្របខ័ណ្ឌ Champions League ជាលើកដំបូង កាលពីរដូវកាលមុន៕
ប្រភពព័ត៌មាន៖ Channel News Asia