បរទេស៖ ក្រុមបិសាចក្រហម Manchester United អាចនឹងចំណាយពេលពួកគេផ្តោតលើការដណ្តើមយកចំណាត់ថ្នាក់លេខ១នៅលើកំពូលតារាងនៃក្របខ័ណ្ឌ Premier League នៅរដូវកាលនេះ ប៉ុន្តែ ក្រុមរបស់លោក Ole Gunnar Solskjaer អាចធ្វើឲ្យពួកគេផ្ទាល់ឡើងឈរលេខ២ និងដេញតាមពីក្រោយក្រុមកំពុងនាំមុខ Liverpool ត្រឹម២ពិន្ទុ តាមរយៈការដណ្តើមបានជ័យជម្នះនៅលើទឹកដីក្រុម Leicester City នៅថ្ងៃសៅរ៍។
លោក Solskjaer បានប្រឈមមុខនឹងសំណួរជាច្រើនជុំវិញអនាគតរបស់លោក ក្រោយពីក្រុម Man United បានធ្លាក់ចេញពីក្របខ័ណ្ឌ Champions League ក្នុងវគ្គចែកពូល និងបានភាពត្រដាបត្រដួសរបស់ពួកគេលើទឹកដីខ្លួនឯង ប៉ុន្តែ គ្រូបង្វឹកសញ្ជាតិន័រវែសរូបនេះ បានដឹកនាំឲ្យក្រុមខ្លួនដណ្តើមបានជ័យជម្នះ៦លើក និងស្មើ១លើក ក្នុងចំណោមការប្រកួតលីក៧លើកចុងក្រោយ ដើម្បីធ្វើឲ្យក្រុមរបស់លោកឡើងឈរលេខ៣ ដោយមាន២៦ពិន្ទុ។ ក្រោយពីដណ្តើមបានជ័យជម្នះយ៉ាងកក់ក្តៅក្នុងលទ្ធផល ៦-២ លើក្រុម Leeds United កាលពីចុងសប្តាហ៍មុន ក្រុម Man United នឹងព្រឹងផ្អែកលើកំណត់ត្រាយ៉ាងល្អឥតខ្ចោះពេលប្រកួតក្រៅដីរបស់ពួកគេ នៅពេលដែលពួកគេធ្វើដំណើរទៅជួបក្រុម Leicester ដែលកំពុងនាំមុខ១ពិន្ទុលើក្រុមរបស់លោក Solskjaer ប៉ុន្តែ នៅសល់១ប្រកួតក្នុងដៃ។
មានតែក្រុម Liverpool ប៉ុណ្ណោះ ដែលមានកំណត់ត្រាស្មើនឹងក្រុម Leicester តាមរយៈការដណ្តើមបានជ័យជម្នះ៩លើកជាប់ៗគ្នានៅរដូវកាលនេះ ប៉ុន្តែ ក្រុមរបស់លោក Brendan Rodgers ក៏បានរងបរាជ័យ៥លើក ក្នុងចំណោមការប្រកួត១៤លើកមកទល់ពេលនេះផងដែរ៕
ប្រភពព័ត៌មាន៖ Channel News Asia
