បរទេស៖ តារាបាល់ទាត់ដ៏ឆ្នើមរបស់ប្រេស៊ីល Neymar កំពុងតែស្ថិតនៅចំកណ្តាលនៃការបង្កឲ្យមានភាពចម្រូងចម្រាស់ជាថ្មី ក្រោយពីកាសែតប្រេស៊ីលជាច្រើន បានចេញផ្សាយថា ខ្សែប្រយុទ្ធរូបនេះ កំពុងតែរៀបចំកម្មវិធីជប់លាងអបអរចូលឆ្នាំថ្មីដ៏មហាឱឡារឹកមួយ បើទោះបីមានករណីឆ្លងវីរុសកូរ៉ូណាក៏ដោយ។
លោក Acelmo Goes អ្នកសរសេរអត្ថបទម្នាក់ឲ្យកាសែត O Globo បានអះអាងថា ខ្សែប្រយុទ្ធរបស់ក្លិប Paris Saint-Germain រូបនេះ កំពុងតែរៀបចំកម្មវិធីជប់លាងរយៈពេល១ឆ្នាំ ដែលមានមនុស្សចូលរួម៥០០នាក់ នៅឯវិមានដ៏ប្រណិតរបស់គេ ក្បែរទីក្រុង Rio de Janeiro ខណៈដែលពិធីជប់លាងនោះបានចាប់ផ្តើមកាលពីថ្ងៃសៅរ៍ ហើយនិងបន្តរហូតដល់ថ្ងៃចូលឆ្នាំថ្មី។ ប្រស៊ីល គឺជាប្រទេសដែលមានមនុស្សស្លាប់ច្រើនជាងគេបំផុតក្នុងពិភពលោក ដោយសារតែវីរុសកូរ៉ូណា ក្រោយពីមានមនុស្សស្លាប់១៩១ ០០០នាក់ និងមានករណីឆ្លងចំនួន៧,៤លាននាក់។
Neymar ដែលមិនមែនទើបតែបានបង្កើតភាពចម្រូងចម្រាស់ជុំវិញការរៀបចំពិធីជប់លាងនោះ ក៏បានដំឡើងឧបករណ៍កាត់បន្ថយសំឡេងផងដែរ ដើម្បីកុំឲ្យរំខានដល់អ្នកជិតខាង។ លោក Leo Dias ដែលជាអ្នកសរសេរអត្ថបទឲ្យគេហទំព័រ Metropoles បានបញ្ចេញឈ្មោះសិល្បៈករល្បីៗដែលនឹងត្រូវសម្តែងនៅក្នុងកម្មវិធីជប់លាងរបស់ Neymar ដូចជានាង Ludmilla និងលោក Wesley Safadao ជាដើម៕
ប្រភពព័ត៌មាន៖ Channel News Asia
