បរទេស៖ ក្លិប Paris Saint-Germain កាលពីថ្ងៃអង្គារ បានបញ្ជាក់ពីការបណ្តេញលោកគ្រូបង្វឹក Thomas Tuchel ដែលបានស្ថិតក្នុងក្លិបនេះ តាំងពីខែកក្កដា ឆ្នាំ២០១៨ ប៉ុន្តែ មិនបានបញ្ជាក់ពីគ្រូបង្វឹកដែលត្រូវចូលជំនួសឡើយ។
ក្លិបយក្សរបស់បារាំងមួយនេះ បានប្រកាសក្នុងសេចក្តីថ្លែងការណ៍មួយថា៖ «ក្រោយពីការវិភាគដ៏ស៊ីជម្រៅទៅលើស្ថានភាពកីឡារបស់ខ្លួន ក្លិប Paris Saint-Germain បានសម្រេចរំលាយកិច្ចសន្យារបស់លោក Thomas Tuchel»។ លោកគ្រូបង្វឹកសញ្ជាតិអាហ្សង់ទីន Mauricio Pochettino ត្រូវបានព័ត៌មានជាច្រើនចេញផ្សាយថា គឺជាបេក្ខភាពឈានមុខគេក្នុងការក្លាយជាគ្រូបង្វឹកបន្ទាប់របស់ PSG។ លោក Tuchel ដែលការចាកចេញរបស់លោកត្រូវបានព័ត៌មានជាច្រើនចេញផ្សាយរួចជាស្រេច ប៉ុន្តែ មិនមានការបញ្ជាក់ពីក្លិបសាម៉ី កាលពីសប្តាហ៍មុននោះ បានដឹកនាំក្រុម PSG ក្នុងការប្រកួត១២៧លើក ក្នុងរាល់យុទ្ធនាការទាំងអស់ ដោយឈ្នះ៩៥លើក ស្មើ១២លើក និងចាញ់២០លើក។
លោកបានដឹកនាំឲ្យក្រុមនេះឈ្នះពានក្របខ័ណ្ឌ Ligue 1 ២លើក (ឆ្នាំ២០១៩ និង២០២០) ក៏ដូចជាពានរង្វាន់ French Cup និង League Cup ឆ្នាំ២០២០។ គ្រូបង្វឹកសញ្ជាតិអាល្លឺម៉ង់វ័យ៤៧ឆ្នាំរូបនេះ ក៏បានដឹកនាំឲ្យក្លិប PSG ឈានទៅប្រកួតក្របខ័ណ្ឌ Champions League វគ្គផ្តាច់ព្រ័ត្រជាលើកដំបូងរបស់ពួកគេ កាលពីខែសីហា ឆ្នាំមុនផងដែរ មុននឹងចាញ់ក្រុម Bayern Munich ក្នុងលទ្ធផល ១-០៕
ប្រភពព័ត៌មាន៖ Channel News Asia
