បរទេស៖ លោក Jose Mourinho កាលពីថ្ងៃចន្ទ បានចាត់ទុកការប្រកួតពាន League Cup វគ្គពាក់កណ្តាលផ្តាច់ព្រ័ត្ររបស់ក្រុម Tottenham ជាមួយនឹងក្រុម Brentford ជាការប្រកួតដ៏សំខាន់បំផុតក្នុងរជ្ជកាលដឹកនាំរបស់លោកមកទល់ពេលនេះ។
ក្រុមរបស់លោក Mourinho នឹងធ្វើជាម្ចាស់ផ្ទះទទួលក្រុម Brentford នៅរាត្រីនេះ ខណៈដែលពួកគេនឹងសម្លឹងរកការឈានទៅប្រកួតដណ្តើមពាន League Cup វគ្គផ្តាច់ព្រ័ត្រជាមួយនឹងក្រុម Manchester United ឬ Manchester City។ ក្រុម Tottenham មិនធ្លាប់ឈ្នះពានសោះ បើគិតចាប់តាំងពីបានឈ្នះពាន League Cup ឆ្នាំ២០០៨ ហើយលោក Mourinho សង្ឃឹមថា នឹងបញ្ចប់ការរង់ចាំនេះ។ លោក Mourinho ដែលធ្លាប់បានលើកពាន League Cup ៤លើកក្នុងអាជីពរបស់លោកនោះ ជឿជាក់ថា សារសំខាន់នៃការឈ្នះពានមួយនៅរដូវកាលនេះ ធ្វើឲ្យការប្រកួតជាមួយនឹងក្រុម Brentford សំខាន់ជាងការប្រកួតណាៗទាំងអស់ បើគិតចាប់តាំងពីលោកបានចូលកាន់តែតំណែងកាលពីខែវិច្ឆិកា ឆ្នាំ២០១៩។
លោក Mourinho បានបញ្ជាក់ថា៖ «ពិតណាស់ ខ្ញុំគិតអ៊ីចឹង។ បើគិតដល់ពីការប្រជែងពានរបស់ក្លិបអស់រយៈពេលជាច្រើនឆ្នាំមកហើយនោះ ខ្ញុំនឹងនិយាយបែបនេះ។ ពិតណាស់ យើងតែងតែមានការប្រកួតសំខាន់ៗជាច្រើន ដោយកាលពីរដូវកាលមុន យើងមានការប្រកួតនៅលើទឹកដីក្រុម Crystal Palace ដែលបានកាត់សេចក្តីថា យើងមានឱកាសចូលរួមក្នុងពាន Europa League នៅរដូវកាលនេះ ឬអត់»៕
ប្រភពព័ត៌មាន៖ Channel News Asia