បរទេស៖ លោក Pep Guardiola អ្នកចាត់ការទូទៅរបស់ក្រុម Manchester City បានបញ្ជាក់ថា លោកមានក្រុមមួយដែលគ្មានកីឡាករគ្រប់គ្រាន់សម្រាប់ការប្រកួតដណ្តើមពាន League Cup វគ្គពាក់កណ្តាលផ្តាច់ព្រ័ត្រនៅរាត្រីនេះ នៅលើទឹកដីក្រុម Manchester United ដោយសារតែឥទ្ធិពលនៃការផ្ទុះវីរុសកូវីដ-១៩ នៅក្លិបមានមូលដ្ឋាននៅកីឡដ្ឋាន Etihad របស់លោក។
ក្លិបនីមួយៗ អាចបញ្ចូលឈ្មោះកីឡាករបម្រុងចំនួន៩នាក់ ក្នុងការប្រកួតពាន League Cup វគ្គពាក់ណ្តាលផ្តាច់ព្រ័ត្រ និងវគ្គផ្តាច់ព្រ័ត្រ ក្រោយពីក្របខ័ណ្ឌលីកអង់គ្លេស បានអនុម័តឲ្យមានការផ្លាស់ប្តូរកីឡាករ៥នាក់ក្នុង១ប្រកួត។ ប៉ុន្តែ ទោះបីជាយ៉ាងណា Man City បានអវត្តមានកីឡាករ៦នាក់ ដោយសារតែការឆ្លងវីរុសកូរ៉ូណា ក្នុងពេលពួកគេយកឈ្នះលើក្រុម Chelsea ក្នុងលទ្ធផល ៣-១ ក្នុងការប្រកួតក្របខ័ណ្ឌ Premier League កាលពីចុងសប្តាហ៍មុន។ ការប្រកួតរបស់ក្រុម Man City នៅលើទឹកដីក្រុម Everton ក៏ត្រូវបានលើកពេលផងដែរ ដោយសារតែករណីឆ្លងវីរុសជាច្រើន នៅក្នុងជំរំហ្វឹកហាត់ ខណៈដែលក្លិបស្ថិតក្នុងទីក្រុង Manchester មួយនេះ រួមជាមួយនឹងក្រុម Newcastle United, Sheffield United និង Fulham ស្ថិតក្នុងចំណោមក្រុមដែលរងគ្រោះដោយសារតែវីរុសកូរ៉ូណា ក្នុងក្របខ័ណ្ឌកំពូល។
លោក Guardiola បានប្រាប់ទូរទស្សន៍ Sky Sports ថា៖ «យើងមិនមានកីឡាករច្រើនឡើយ។ ការលេងការប្រកួត១ ឬ២ មិនអីនោះទេ ប៉ុន្តែ ប្រសិនបើករណីបែបនេះ រក្សាកើតឡើងក្នុងរយៈពេលយូរ ហើយអ្នកអាចប្រើប្រាស់កីឡាករបានត្រឹមតែ១៤ ឬ១៥នាក់ នោះវានឹងក្លាយជារឿងដ៏លំបាកហើយ»៕
ប្រភពព័ត៌មាន៖ Channel News Asia
