បរទេស៖ Neymar បានបង្ហើបប្រាប់ឈ្មោះកីឡាករបាល់ទាត់ចំនួន៣នាក់ដែលរូបគេតែងចំណាយពេលមើលការប្រកួតបាល់ទាត់របស់ពួកគេបំផុត។ ក្នុងបទសម្ភាសន៏ប្រាប់គេហទំព័រផ្លូវការមួយរបស់ FIFA កីឡាករដែលមានជំនាញញាក់បាល់ដ៏បិនប្រសព្វរូបនេះបានបញ្ជាក់ប្រាប់ដូច្នេះថា៖ វីរបុរសក្លឹប Barcelona កីឡាករ Ronaldinho អតីតខ្សែប្រយុទ្ធរៀមច្បង Robinho របស់ក្រុម Real Madrid និង អតីតមិត្តរួមក្រុម Lionel Messi ជាកីឡាករ៣នាក់ដែលខ្ញុំចូលចិត្តមើលវីដេអូប្រកួតរបស់ពួកគេ។
គួររំលឹកថាក្នុងចំណោមកីឡាករ៣រូបខាងលើគឺអតីតខ្សែប្រយុទ្ធក្រុម Barcelona កីឡាករប្រេស៊ីលវ័យ ២៨ ឆ្នាំរូបនេះធ្លាប់លេងរួមក្រុមជាមួយប្រធានក្រុម Barcelona រយៈពេល ៤ឆ្នាំនៅឯទឹកដី Camp Nou មុនពេលសម្រចចិត្តផ្ទេរទៅកាន់ PSG ក្នុងតម្លៃកំនត់ត្រាពិភពលោកតម្លៃ២០០ លានផោនកាលពីឆ្នាំ ២០១៧។
កីឡាករដែលជួយប្រេស៊ីលឈ្នះមេដៃមាសអូឡាំពិកឆ្នាំ២០១៦រូបនេះបន្តថាការលេងរួមក្រុមជាមួយ Leo Messi គឺជាបទពិសោធន៏ពិសេសមួយ ហើយយើងបានក្លាយជាមិត្តភក្តិដ៏ជិតស្និទនិងគ្នា។ យ៉ាងណាមិញ Neymar ពោលសរសើរមិនដាច់ពីមាត់ពីសមត្ថភាពនិងបច្ចេកទេសរបស់ Messi ថាជាកីឡាករដែលល្អបំផុតក្នុងប្រវត្តិសាស្រ្តដែលរូបគេធ្លាប់លេងបាល់ទាត់អាជីពកន្លងមក៕
ប្រភពព័ត៍មាន៖ Sportbible