បរទេស៖ ក្លិបបិសាចក្រហម Manchester United បានប្រកាសកាលពីថ្ងៃព្រហស្បតិ៍ថា ពួកគេបានបំពេញការផ្ទេរខ្សែបម្រើស្លាបអន្តរជាតិកូដឌីវ័រ Amad Diallo ពីក្លិប Atalanta របស់ក្របខ័ណ្ឌ Serie A។ កីឡាករវ័យ១៨ឆ្នាំរូបនេះ បានចុះហត្ថលេខាលើកុងត្រាមួយនៅកីឡដ្ឋាន Old Trafford រហូតដល់ឆ្នាំ២០២៥ ជាមួយនឹងជម្រើសនៃការបន្តកិច្ចសន្យាបន្ថែមទៀត។
កិច្ចព្រមព្រៀងគ្នារវាងក្លិបទាំង២ ដំបូងឡើយត្រូវបានប្រកាសកាលពីថ្ងៃទី៥ ខែតុលា ប៉ុន្តែ ការផ្ទេរនេះ ត្រូវរង់ចាំការពិនិត្យសុខភាព សុំលិខិតអនុញ្ញាតឲ្យធ្វើការ និងលក្ខខណ្ឌផ្ទាល់។ បច្ចុប្បន្នដំណាក់កាលទាំងនោះត្រូវបានបំពេញរួចរាល់ហើយ និងពាក្យស្នើសុំមួយត្រូវបានធ្វើឡើងដើម្បីសុំទិដ្ឋាការ។ នៅពេលដែលទិដ្ឋាការនេះ ត្រូវបានចេញឲ្យ Diallo នឹងទទួលបានសិទ្ធិក្នុងការធ្វើដំណើរទៅកាន់ទីក្រុង Manchester។ Diallo បានបង្ហាញខ្លួនសរុបចំនួន៥លើកសម្រាប់ក្លិប Atalanta និងបានស៊ុតបាល់បញ្ចូលទី១គ្រាប់។ លោក Ole Gunnar Solskjaer គ្រូបង្វឹករបស់ក្លិប Man United បានបញ្ជាក់ថា យុវជនរូបនេះ បានស្ថិតក្នុងរ៉ាដារបស់ក្លិបអស់រយៈពេលជាច្រើនឆ្នាំមកហើយ។
លោកបានឲ្យដឹងថា៖ «ក្លិប Manchester United មានប្រវត្តិជាទីមោទនទាក់ទងនឹងការអភិវឌ្ឍកីឡាករវ័យក្មេង ហើយអ្វីៗត្រូវបានរៀបចំឡើងដើម្បីអាចឲ្យ Amad ឈានដល់សក្តានុពលរបស់គេនៅទីនេះ»។ តម្លៃខ្លួននៃការផ្ទេរត្រូវបានបណ្តាញសារព័ត៌មាននៅចក្រភពអង់គ្លេសរំពឹងទុកមានចំនួន២១លានអឺរ៉ូ (ស្មើនឹង២៥,៧៧លានដុល្លារអាមេរិក)៕
ប្រភពព័ត៌មាន៖ Channel News Asia
