បរទេស៖ Paul Pogba និងមិត្តរួមក្រុម Amad Diallo របស់ក្រុមបិសាចក្រហម Man. Utd បានកាន់ ទង់ជាតិប្រទេសប៉ាឡេស្ទីនព្រមគ្នារួចហើយដើរនៅជុំវិញកីឡាដ្ឋាន Old Trafford អំឡុងពេលប្រកួតសប្តាហ៏ទី៣៧ ដោយលទ្ធផលស្មើ ១-១ ជាមួយក្រុម Fulham កាលពីយប់ថ្ងៃអង្គារ ។ Man.UtdដែលទទួលបានតំណែងជើងឯករងPremier League រដូវកាលនេះ បានធ្វើការប្រកួតនៅចំពោះមុខអ្នកគាំទ្រ ១០.០០០ នាក់ជាលើកដំបូងនៅទឹកដីOld Trafford ក្រោយច្បាប់រឹតបន្តឹងលើការការពារមេរោគកូវីត-១៩លើការប្រកួតបិទទ្វារកីឡាដ្ឋាននៅប្រទេសអង់គ្លេសត្រូវបានកាត់បន្ថយ។
វាក៏ជាការប្រកួតក្នុងផ្ទះលើកចុងក្រោយនៅរដូវកាលនេះ មុនពេលធ្វើដំណើរទៅជួប Wolves នាថ្ងៃអាទិត្យក្នុងការប្រកួតបិទបញ្ចប់ក្របខ័ណ្ឌ Premier League ចុងក្រោយរបស់ពួកគេ។ និងមុនពេលធ្វើដំណើរទៅកាន់ ទីក្រុង Gdansk ប្រទេសប៉ូឡូញសម្រាប់ការប្រកួតវគ្គផ្តាច់ព្រ័ត្រ Europa League ទល់នឹង Villarreal នៅថ្ងៃទី២៦ឧសភា ២០២៦។
កាលពីសប្តាហ៍មុន Pogba ក៏បានបង្ហាញការគាំទ្ររបស់ខ្លួនចំពោះប្រជាជនប៉ាឡេស្ទីនលើបណ្តាញសង្គមដោយបានសរសេររៀបរាប់ថាៈ ពិភពលោកត្រូវការសន្តិភាពនិងសេចក្តីស្រឡាញ់។ មិនយូរប៉ុន្មានវានឹងត្រូវបានចាប់ផ្តើម។ សូមឱ្យយើងទាំងអស់គ្នាស្រឡាញ់គ្នាទៅវិញទៅមក។សមាជិកជ័យលាភីWorld Cup ២០១៨បានលើកសារខាងលើនេះមកបញ្ជាក់បន្ថែមម្តងទៀតកាលពីថ្ងៃអង្គារដោយមានន័យស្រដៀងគ្នានេះថាៈ សូមរក្សាពិភពលោករបស់យើងឲ្យមានសុវត្ថិភាពនិងរួចផុតពីអំពើហិង្សា សូមអធិស្ឋានសម្រាប់ប៉ាឡេស្ទីន។ គួរកត់សម្គាល់ថាPogba គឺជាកីឡាករលេចធ្លោម្នាក់នៅក្នុងក្របខ័ណ្ឌ Premier Leagueដែលបង្ហាញពីសាមគ្គីភាពជាមួយប្រទេសប៉ាឡេស្ទីនក្នុងអំឡុងពេលដែលកើតមានជម្លោះដ៏រំារៃនាពេលបច្ចុប្បន្ននៅភាគកណ្តាលភាគខាងកើតនៃប្រទេសជាមួយនិង អ៊ីស្រអែល ហើយរូបគេក៏មិនមែនជាកីឡាករឯកោដែលស្ថិតក្នុងទង្វើរមួយនេះដែរ៕
ប្រភពព័ត៍មាន៖ Metro