បរទេស៖ អតីតខ្សែប្រយុទ្ធ Manchester United លោក Dimitar Berbatov បានប្រាប់អោយ Jesse Lingard ស្វែងរកកន្លែងថ្មី ដើម្បីមានឱកាសបានបង្ហាញសមត្ថភាព។
Berbatov បានប្រាប់ Stadium Astro ថា “និយាយតាមត្រង់ទៅពេលវេលារបស់គេ ( Lingard ) បានដល់ទៅទីបញ្ចប់ហើយ។ រូបគេមិនសូវជាបានបង្ហាញខ្លួនទេនៅរដូវកាលនេះ ដោយវាអាចឆ្លុះបញ្ចាំងថាលោក Ole Gunnar Solskjaer អស់ទំនុកលើរូបគេហើយ។ ប្រសិនបើអ្នកនៅក្លឹបមួយរយៈពេលយូរបែបនេះ ហើយឈានចូលវ័យ២៨ឆ្នាំ អ្នកគួរតែក្រឡែកមើលទៅក្រោយវិញ ហើយនិយាយថា ‘តើខ្ញុំសម្រេចបានអ្វីខ្លះហើយ? តើខ្ញុំពេញចិត្តអ្វីដែលខ្លួនឯងបានធ្វើនៅទីនេះទេ? តើពេលវេលារបស់ខ្ញុំដល់ទីបញ្ចប់ហើយមែនទេ?’។ ដូចនេះខ្ញុំគិតថារូបគេគួរតែស្វែងរកក្លឹបថ្មីហើយ ដើម្បីមានឱកាសបានបង្ហាញសមត្ថភាពរបស់ខ្លួន”។
Jesse Lingard ទំនងជាកីឡាករម្នាក់ក្នុងចំណោមកីឡាករដទៃទៀត ដែលអាចចាកចេញពី Manchester United ក្នុងខែមករានេះ ខណៈលោក Ole Gunnar Solskjaer ទើបតែបញ្ចាក់ថា Marcos Rojo និង Sergio Romero កំពុងស្វែកក្លឹបថ្មី ខណៈកុងត្រារបស់ពួកគេនឹងត្រូវផុតនៅខែមិថុនាខាងមុខនេះ រឺឯ Phil Jones និង Brandon Williams ក៏អាចនឹងចាកចេញផងដែរ៕
ប្រភពព័ត៍មាន៖ Manchester Evening News
