បរទេស៖ លោក Pep Guardiola បានធ្វើការព្រមានថា កម្លាំងសុះអាចនឹងបាត់បង់ភ្លាមៗ ខណៈដែលលោករៀបចំក្រុម Manchester City របស់លោកដើម្បីទៅជួក្រុម Brighton ក្រោយពីដណ្តើមបានជ័យជម្នះ៦លើកជាប់ៗគ្នា ក្នុងរាល់យុទ្ធនាការទាំងអស់។
Man City នឹងធ្វើដំណើរទៅកាន់ការប្រកួតលើទឹកដីខ្លួនឯងនៅរាត្រីនេះ ដោយដេញតាមពីក្រោយក្រុម Liverpool ចំនួន៤ពិន្ទុ នៅលើតារាងក្របខ័ណ្ឌ Premier League ខណៈដែលនៅសល់២ប្រកួតក្នុងដៃ ហើយពួកគេកំពុងតែមានការជឿជាក់ខ្ពស់ ក្រោយពីការវិលចូលលេងវិញរបស់ខ្សែប្រយុទ្ធអន្តរជាតិអង់គ្លេស Raheem Sterling។ កំណត់ត្រានៃការមិនស្គាល់ចាញ់ចំនួន១៣លើកជាប់ៗគ្នាបានកើតឡើង ក្រោមជំនួយបន្តិចបន្តួចប៉ុណ្ណោះពីខ្សែប្រយុទ្ធ Sergio Aguero ដែលនឹងអវត្តមានម្តងទៀត ខណៈដែលរូបគេត្រូវដាក់ខ្លួនឲ្យនៅដាច់ដោយឡែក ដោយសារតែបានប៉ះពាល់ផ្ទាល់ជាមួយនឹងអ្នកដែលបានតេស្តឃើញលទ្ធផលជាវិជ្ជមានលើវីរុសកូរ៉ូណា។ កីឡាករ Eric Garcia ក៏កំពុងតែដាក់ខ្លួនឲ្យនៅដាច់ដោយឡែកផងដែរ ដោយសារតែទទួលលទ្ធផលតេស្តជាវិជ្ជមាន ខណៈដែលខ្សែការពារ Aymeric Laporte និង Nathan Ake កំពុងតែរបួស។
លោក Guardiola បាននិយាយកាលពីថ្ងៃអង្គារថា៖ «សន្ទុះសុះ អាចកើតឡើង និងបាត់បង់ទៅវិញ ក្នុងពេលដ៏ខ្លី។ យើងមិនអាចមើលស្រាលលើក្រុមដែលយើងបានផ្តួលនាពេលថ្មីៗនេះឡើយ ជាពិសេសក្នុងក្របខ័ណ្ឌ Premier League និង League Cup ពេលប្រកួតជាមួយនឹងក្រុមខ្លាំង Chelsea និង Manchester United នៅក្រៅដី»៕
ប្រភពព័ត៌មាន៖ Channel News Asia