បរទេស៖ Neymar កំពុងតែស្ថិតលើផ្លូវឆ្ពោះទៅកាន់ការវិលទៅលេងឲ្យក្រុម Paris Saint-Germain ក្រោយពីការអវត្តមានអស់រយៈពេល៤សប្តាហ៍ នៅក្នុងការប្រកួតពាន Champions Trophy ជាមួយនឹងក្រុមខ្លាំង Marseille នៅរាត្រីនេះ។
ក្នុងសន្និសីទសារព័ត៌មានតាមរយៈវីដេអូមួយ នៅមុនពេលការប្រកួតនេះ លោក Mauricio Pochettino គ្រូបង្វឹករបស់ក្រុម PSG បានឲ្យដឹងថា៖ «Neymar នឹងអាចចូលលេងបាន ហើយនិងស្ថិតក្នុងក្រុមនេះ។ យើងនឹងធ្វើការសម្រេចចិត្តនៅថ្ងៃស្អែកនេះ (ថ្ងៃពុធ) ថា រូបគេចូលលេង ឬស្ថិតជាកីឡាករបម្រុង»។ កីឡាករដែលមានតម្លៃខ្លួនខ្ពស់ជាងគេបំផុតក្នុងពិភពលោករូបនេះ មិនធ្លាប់បានចូលលេងសោះ បើគិតចាប់តាំងត្រូវបានគេសែងចេញពីទីលានប្រកួតដោយសារតែបួសកជើង ក្នុងពេលក្រុម PSG បានរងបរាជ័យក្រោមស្នាដៃក្រុម Lyon ក្នុងការប្រកួតក្របខ័ណ្ឌ Ligue 1 កាលពីថ្ងៃទី១៣ ខែធ្នូ ដោយរូបគេបានអវត្តមានការប្រកួតនាពេលបន្ទាប់ចំនួន៥ប្រកួត។
Neymar គឺជាកីឡាករម្នាក់ក្នុងចំណោមកីឡាករ PSG ទាំង៣នាក់ ដែលបានរងពិន័យកាតក្រហម ក្នុងការប្រកួតរវាងក្រុម PSG និងក្រុម Marseille កាលពីពេលថ្មីៗនេះ ខណៈដែល Marseille បានលេងការប្រកួតជាមួយនឹងសមាជិកត្រឹមតែ៩នាក់ប៉ុណ្ណោះ។ តារាឆ្នើមអន្តរជាតិប្រេស៊ីលរូបនេះ បានចោទប្រកាន់ខ្សែការពារ Alvaro Gonzalez របស់ក្លិប Marseille ពីបទរើសអើងជាតិសាសន៍ បើទោះបីមិនមានការចាត់វិធានការ ដោយសារតែការខ្វះភស្តុតាងក៏ដោយ៕
ប្រភពព័ត៌មាន៖ Channel News Asia
