បរទេស៖ លោក Hansi Flick គ្រូបង្វឹករបស់ក្រុម Bayern Munich ហាក់មិនជឿនឹងភ្នែកខ្លួនឯង ខណៈដែលក្រុមម្ចាស់ការពារជើងឯករបស់លោក បានធ្លាក់ចេញពីពាន German Cup កាលពីថ្ងៃពុធ ក្រោយពីបានរងបរាជ័យក្រោមស្នាដៃក្រុមស្ថិតក្នុងក្របខ័ណ្ឌលំដាប់ទី២ Holstein Kiel ដែលបានទទួលជ័យជម្នះក្នុងការស៊ុតបាល់ប៉េណាល់ទីក្នុងលទ្ធផល ៦-៥ បន្ទាប់ពីការប្រកួតជុំទី២របស់ពួកគេ បានបញ្ចប់ក្នុងលទ្ធផល ២-២ នៅនាទីបន្ថែម១៥នាទី២ដង។ លោក Flick បានប្រាប់ទូរទស្សន៍ Sky ថា៖ «នេះជារឿងដែលមិនគួរឲ្យជឿ។
យើងពិតជាខកចិត្តណាស់។ នេះគឺដោយសារតែយើងបណ្តោយឲ្យមានគ្រាប់បាល់តាមស្មើ ក្នុងលទ្ធផល ២-២ នៅវិនាទីចុងក្រោយនៃម៉ោងធម្មតា។ សូមអបអរសាទរដល់ក្រុម Kiel។ យើងត្រូវតែបំភ្លេចការខកចិត្តនេះ និងធ្វើឲ្យបានកាន់តែល្អប្រសើរ»។ ខ្សែប្រយុទ្ធ Thomas Mueller របស់ក្រុម Bayern បានបញ្ជាក់ថា ការបរាជ័យនេះ ពិតជាចុកចាប់ណាស់។ នេះគឺជាលើកទី១ហើយដែលក្រុម Bayern បានធ្លាក់ចេញពីការប្រកួតពាន German Cup ក្រោមស្នាដៃក្រុមមិនស្ថិតក្នុងក្របខ័ណ្ឌ Bundesliga បើគិតចាប់តាំងពីធ្លាក់ចេញក្រោមស្នាដៃក្រុមស្ថិតក្នុងក្របខ័ណ្ឌលំដាប់ទី៤ Magdeburg ក្នុងរដូវកាលឆ្នាំ២០០០-២០០១។
Mueller បានឲ្យដឹងថា៖ «បើទោះបីស្តាប់ទៅជារឿងឆ្កួតលេលា ក្រោយពីការធ្លាក់ចេញពីពាននេះ ក្រោមស្នាដៃក្រុម Kiel ក៏ដោយ ប៉ុន្តែ សំណាងមិនបានស្ថិតលើក្រុមយើងឡើយ»៕
ប្រភពព័ត៌មាន៖ Channel News Asia
