បរទេស៖ ក្រុម Leicester បានឡើងឈរនៅលើកំពូលតារាងនៃក្របខ័ណ្ឌ Premier League តាមរយៈការផ្តល់ការរងបរាជ័យដ៏អាម៉ាសមួយផ្សេងទៀតក្នុងលទ្ធផល ២-០ លើក្រុម Chelsea កាលពីថ្ងៃអង្គារ ដើម្បីធ្វើឲ្យលោកគ្រូបង្វឹក Frank Lampard ត្រូវប្រយុទ្ធដើម្បីរក្សាវត្តមាននៅកីឡដ្ឋាន Stamford Bridge។
ក្រុមតោខៀវ បច្ចុប្បន្ន ដណ្តើមបានជ័យជម្នះត្រឹមតែ២លើកគត់ក្នុងចំណោមការប្រកួតក្របខ័ណ្ឌលីក៨លើកចុងក្រោយរបស់ពួកគេ ខណៈដែលពួកគេបានធ្លាក់ទៅឈរក្នុងចំណាត់ថ្នាក់លេខ៨ ដោយដេញតាមពីក្រោយក្រុមកំពុងនាំមុខរហូតដល់ទៅ៩ពិន្ទុ។ Chelsea ត្រូវបានរំពឹទុកថា នឹងមានសមត្ថភាពក្នុងការប្រជែងដណ្តើមពាន Premier League ក្រោយពីបានជះទឹកប្រាក់ដល់ទៅ២២០លានផោន (ស្មើនឹង២៩៨លានដុល្លារអាមេរិក) ទៅលើទីផ្សារដោះដូរកីឡាករ។ ប៉ុន្តែ បែរជាក្រុម Leicester ទៅវិញ ដែលកំពុងតែស្ថិតលើផ្លូវក្នុងការបង្កើតឲ្យមានការភ្ញាក់ផ្អើលជាថ្មីដូចក្នុងរដូវកាលឆ្នាំ២០១៥-២០១៦ ដែលនៅពេលនោះពួកគេបានធ្វើឲ្យពិភពលោកភ្ញាក់ផ្អើលតាមរយៈការឈ្នះពាន Premier League។
ការឈ្នះពានជាលើកទី២ក្នុងរយៈពេល៥ឆ្នាំ នឹងបង្កើតឲ្យមានការភ្ញាក់ផ្អើលតិចតួចប៉ុណ្ណោះ បើទោះបីមានភាពខុសគ្នាលើហិរញ្ញវត្ថុរវាងក្រុម Leicester និងក្រុមខ្លាំងទាំង៦នៃក្របខ័ណ្ឌកំពូលរបស់អង់គ្លេសក៏ដោយ ខណៈដែលពួកគេបានធ្វើឲ្យពួកគេក្លាយជាក្រុមខ្លាំងមួយរួចជាស្រេច បើគិតចាប់តាំងពីលោក Brendan Rodgers បានចូលកាន់តំណែងកាលពី២ឆ្នាំមុន៕
ប្រភពព័ត៌មាន៖ Channel News Asia
