បរទេស៖ លោក Zinedine Zidane បានបញ្ជាក់ថា កីឡាកររបស់លោកនៅតែជឿជាក់លើរូបលោក ក្រោយពីក្រុម Real Madrid បានរងបរាជ័យដ៏អាម៉ាស ក្រោមស្នាដៃក្រុមស្ថិតក្នុងក្របខ័ណ្ឌលំដាប់ទី៣ Alcoyano ក្នុងការប្រកួតពាន Copa del Rey កាលពីថ្ងៃពុធ។
ក្រុមម្ចាស់ជើងឯកក្របខ័ណ្ឌ La Liga មួយនេះ បានរងបរាជ័យក្នុងលទ្ធផល ២-១ ក្រោមស្នាដៃក្រុម Alcoyano ដែលបានកត់ត្រាជ័យជម្នះដ៏មិននឹកស្មានដល់ នៅនាទីបន្ថែម១៥នាទី២ដង ក្រោយពីបានរងពិន័យកាតក្រហមលើកីឡាករម្នាក់របស់ខ្លួន។ បច្ចុប្បន្នក្រុម Real Madrid បានកត់ត្រាជ័យជម្នះត្រឹមតែ១លើកគត់ក្នុងចំណោមការប្រកួត៥លើកចុងក្រោយ ខណៈដែលរងបរាជ័យនេះ កាន់តែបន្ថែមសម្ពាធលើលោកគ្រូបង្វឹក Zidane។ នៅពេលដែលត្រូវបានចោទសួរថា លោកនៅតែមានការគាំទ្រពីកីឡាករ ឬយ៉ាងណា លោក Zidane បានឆ្លើយថា៖ «ពិតណាស់ ខ្ញុំជឿថា អ៊ីចឹង អ្នកត្រូវតែសួរពួកគេដោយខ្លួនឯង។ យើងបានសម្រេចលទ្ធផលល្អៗជាច្រើននៅរដូវកាលនេះ ក្រៅពីការប្រកួត៤លើកចុងក្រោយ។
ពេលនេះ យើងមានការប្រកួត La Liga និង Champions League ហើយយើងត្រូវតែធ្វើការ។ មិនថា ខ្ញុំនិយាយបែបណា ប៉ុន្តែ អ្នកត្រូវតែសួរកីឡាករដោយខ្លួនឯង។ ខ្ញុំមិនអាចឆ្លើយបានឡើយ»៕
ប្រភពព័ត៌មាន៖ Channel News Asia