បរទេស៖ លោក Frank Lampard កំពុងតែជិតអស់ពេលហើយ ក្នុងការសង្គ្រោះការងាររបស់លោក ក្រោយពីការរងបរាជ័យរបស់ក្រុម Chelsea ក្រោមស្នាដៃក្រុម Leicester City បានធ្វើឲ្យថ្នាក់ដឹកនាំក្លិប ចាប់ផ្តើមកំណត់ឈ្មោះគ្រូបង្វឹកដែលត្រូវកាន់តំណែងជាអ្នកចាត់ការទូទៅរបស់ពួកគេ។
Chelsea បានស្ថិតក្នុងភាពជ្រួលច្របល់ ក្រោយពីការរងបរាជ័យ៥លើកក្នុងចំណោមការប្រកួតក្របខ័ណ្ឌ Premier League ៨លើកចុងក្រោយ ហើយលោក Lampard រកឃើញថា លោកកំពុងតែស្ថិតក្នុងភាពមិនច្បាស់លើតំណែងរបស់លោក។ គ្រូបង្វឹកវ័យ៤២ឆ្នាំរូបនេះ កំពុងតែធ្លាក់ចូលហានិភ័យជុំវិញតំណែងរបស់លោក។ លោកមិនមានពេលច្រើនក្នុងការធ្វើឲ្យថ្នាក់ដឹកនាំជឿជាក់ឡើយ ខណៈដែលក្លិប Chelsea បានចាប់ផ្តើមពិចារណាលើគម្រោងផ្លាស់ប្តូរគ្រូបង្វឹករួចជាស្រេច ដើម្បីផ្លាស់ប្តូរស្ថានភាពរបស់ខ្លួន។ ការបង្ហាញពីទម្រង់លេងមិនបានល្អ ពេលប្រកួតជាមួយនឹងក្រុម Leicester បានបង្ហាញឲ្យឃើញថា លោក Lampard ដែលនៅជាប់កុងត្រារយៈពេល១៨ខែទៀត មិនមានសមត្ថភាពគ្រប់គ្រាន់ក្នុងការទាញយកលទ្ធផលដ៏ល្អបំផុតពីក្រុមឡើយ ក្រោយពីបានចំណាយប្រាក់ច្រើនជាង២០០លានផោន លើកីឡាករថ្មីកាលពីរដូវក្តៅមុន។
ក្លិប Chelsea ដែលនឹងត្រូវធ្វើជាម្ចាស់ផ្ទះទទួលក្រុម Luton ក្នុងការប្រកួតជុំទី៤នៃពាន FA Cup នាថ្ងៃអាទិត្យ ត្រូវបានបញ្ជាក់ប្រាប់ឲ្យដឹងពីការចាប់អារម្មណ៍របស់លោក Thomas Tuchel ក្នុងការទទួលយកការងារជាគ្រូបង្វឹក ប្រសិនបើតំណែងនេះនៅទំនេ៕
ប្រភពព័ត៌មាន៖ The Guardian
