បរទេស៖ ស្របពេលដែលលោក Zinedine Zidane កំពុងតែជួបវិបត្តិជាលើកទី៣ក្នុងការចូលកាន់តំណែងជាលើកទី២របស់លោកនៅក្លិប Real Madrid កីឡាកររបស់លោក ត្រូវតែប្រយុទ្ធម្តងទៀតដើម្បីរក្សាវត្តមានរបស់គ្រូបង្វឹកខ្លួនឲ្យនៅលើទីលានប្រកួត នៅពេលដែលធ្វើដំណើរទៅជួបក្រុម Alaves ក្នុងការប្រកួតក្របខ័ណ្ឌ La Liga នៅថ្ងៃសៅរ៍ ក្រោយពីធ្លាក់ចេញយ៉ាងអាម៉ាសក្នុងការប្រកួតពាន Copa del Rey ក្រោមស្នាដៃក្រុម Alcoyano។
ការរងបរាជ័យក្នុងលទ្ធផល ២-១ នៅនាទីបន្ថែម១៥នាទី២ដង កាលពីថ្ងៃពុធ ក្រោមស្នាដៃក្រុមស្ថិតក្នុងក្របខ័ណ្ឌលំដាប់ទី៣ ដែលជាក្រុមពាក់កណ្តាលអាជីព បានកើតឡើ បន្ទាប់ពីចាញ់ក្រុម Athletic Bilbao ២-១ ក្នុងការប្រកួតពានអេស្ប៉ាញ Super Cup និងបានធ្វើឲ្យក្រុមម្ចាស់ជើងឯក La Liga មួយនេះ ដណ្តើមបានជ័យជម្នះត្រឹមតែ១លើកគត់ក្នុងចំណោមការប្រកួត៥លើកចុងក្រោយ។ លោក Zidane ដែលដឹងយ៉ាងច្បាស់ពីសម្ពាធនៅក្លិប Real នោះ មិនបានបញ្ចេញប្រតិកម្មខ្លាំងចំពោះការចាញ់ក្រោមស្នាដៃក្រុម Alcoyano និងបានបញ្ជាក់ថា នេះគួរតែមិនមែនជារឿងអាម៉ាសឡើយ រួមទាំងបានសន្យាថា ក្រុមរបស់លោកនឹងមិនបាក់ទឹកចិត្តឡើយ ដោយសារតែលទ្ធផលចាញ់នេះឡើយ។
ប៉ុន្តែ បណ្តាញសារព័ត៌មានហាក់បានបង្ហាញពីផ្នត់គំនិតផ្សេងពីនេះ ដោយកាសែត Marca បានសរសេរចំណងជើងដាក់លើគម្របកាសែតថា «គ្មាននរណាម្នាក់អាចគេចផុតគ្រោះមហន្តរាយនេះឡើយ ខណៈដែលកាសែតប្រចាំថ្ងៃ AS បានចាត់ទុកថា «ជារឿងអាម៉ាស»៕
ប្រភពព័ត៌មាន៖ Channel News Asia
