បរទេស៖ ក្រុម Real Madrid ដែលជាម្ចាស់ជើងឯក Champions League បានផ្តួលក្រុម Eintracht Frankfurt ម្ចាស់ជើងឯក Europa League ក្នុងលទ្ធផល ២-០ កាលពីថ្ងៃពុធ ដើម្បីលើកពាន UEFA Super Cup ជាលើកទី៥ និងដើម្បីចាប់ផ្តើមរដូវកាលថ្មីរបស់ពួកគេ ជាមួយនឹងការឈ្នះពាន១រួចជាស្រេច។
គ្រាប់បាល់ស៊ុតបញ្ចូលទីនៅតង់ទី១ពីកីឡាករ David Alaba និងមួយគ្រាប់ទៀតពីខ្សែប្រយុទ្ធ Karim Benzema នៅនាទី ទី៦៥ ដែលបានជួយឲ្យរូបគេក្លាយជាអ្នករកបានគ្រាប់បាល់ច្រើនជាងគេទី២របស់ Real តាមរយៈការរកបនាគ្រាប់បាល់សរុប៣២៤គ្រាប់ បានបំពេញការឈ្នះពានសម្រាប់ក្រុមយក្សអេស្ប៉ាញមួយនេះតែម្តង។ មានតែ Cristiano Ronaldo ដែលរកបាន៤៥០គ្រាប់ មានគ្រាប់បាល់ច្រើនជាង Benzema សម្រាប់ក្រុម Real។
លោក Carlo Ancelotti អ្នកចាត់ការទូទៅរបស់ក្រុម Real Madrid បានប្រាប់ទូរទស្សន៍ Movistar TV ថា៖ «វាមិនមែនជាការប្រកួតដ៏ងាយស្រួលឡើយ ដោយពួកគេបានផ្តល់ការលំបាកនៅតំបន់បម្រើ ប៉ុន្តែ យើងបានស៊ុតបាល់បញ្ចូលទី ហើយយើងបានគ្រប់គ្រងការប្រកួតយ៉ាងល្អបន្ទាប់ពីនោះ»។ គ្រូបង្វឹករូបនេះ បានបន្ថែមទៀតថា៖ «នៅពេលចាប់ផ្តើមរដូវកាលនេះ អ្នកមិនអាចរំពឹងទុក កីឡាករត្រៀមខ្លួនបាន១០០%ឡើយ ប៉ុន្តែ យើងបានទទួលជ័យជម្នះ ហើយយើងបានចាប់ផ្តើមរដូវកាលនេះយ៉ាងល្អ»៕
ប្រភពព័ត៌មាន៖ Channel news Asia