បរទេស៖ Real Madrid នៅតែជាក្លិបបាល់ទាត់ដែលមានតម្លៃខ្ពស់ជាងគេបំផុតប្រចាំទ្វីបអឺរ៉ុប បើទោះបីក្លិបស្ថិតក្នុងក្របខ័ណ្ឌ Premier League បានបង្កើនការគ្រប់គ្រងរបស់ខ្លួនក្នុងកម្រិតដ៏គួរឲ្យកត់សម្គាល់ក៏ដោយ។
នេះបើយោងទៅតាមរបាយការណ៍មួយដែលត្រូវបានចេញផ្សាយនៅថ្ងៃព្រហស្បតិ៍នេះ ពីវេបសាយវិភាគ Football Benchmark។ របាយការណ៍នេះ បានផ្តល់ចំណាត់ថ្នាក់ដល់ក្លិបកំពូលទាំង៣២ប្រចាំទ្វីបអឺរ៉ុប តាមរយៈការគណនាតម្លៃរបស់ក្លិបទាំងនោះ ដោយផ្អែកទៅលើរបាយការណ៍ហិរញ្ញវត្ថុប្រចាំឆ្នាំរបស់ពួកគេ និងការវិភាគលើតម្លៃក្រុម។ Real ដែលនឹងត្រូវប៉ះក្រុម Liverpool ក្នុងការប្រកួតក្របខ័ណ្ឌ Champions League វគ្គផ្តាច់ព្រ័ត្រនៅថ្ងៃសៅរ៍ សប្តាហ៍នេះ បានឈរនៅលើកំពូលតារាង សម្រាប់រយៈពេល៤ឆ្នាំជាប់ៗគ្នា ជាមួយនឹងតម្លៃសរុប៣,១៨៤ពាន់លានអឺរ៉ូ (ស្មើនឹង៣,៤ពាន់លានដុល្លារអាមេរិក)។
លោក Andrea Sartori អ្នករៀបរៀងរបាយការណ៍នេះ បាននិយាយថា៖ «Real Madrid បានពង្រីកការនាំមុខរបស់ពួកគេនៅលើកំពូលតារាង ដោយសារតែការបន្តការទទួលបានជោគជ័យក្នុងកីឡា និងពាណិជ្ជកម្ម»។ ក្លិប Manchester United (ដែលមានតម្លៃ២,៩ពានលានអឺរ៉ុប និង Barcelona (២,៨ពាន់លានអឺរ៉ូ) បានបំពេញចំណាត់ថ្នាក់កំពូលទាំង៣ ខណៈដែលក្លិប Bayern Munich ស្ថិតក្នុងចំណាត់ថ្នាក់លេខ៤ ហើយ Liverpool ស្ថិតក្នុងចំណាត់ថ្នាក់លេខ៥ (២,៥៥៦ពាន់លានផោន)៕
ប្រភពព័ត៌មាន៖ Channel News Asia
