បរទេស៖ លោក Thomas Tuchel បានចាត់ទុកថា ការទទួលបានការតែងតាំងជា អ្នកចាត់ការទូទៅរបស់ក្រុម Chelsea «គឺជាកាដូដ៏ល្អបំផុត ដែលត្រូវបានទុកនៅក្រោមដើមឈើ» ក្រោយពីបានរងការបណ្តេញចេញពីក្លិប Paris Saint-Germain នៅរដូវបុណ្យណូអែល។
គ្រូបង្វឹកសញ្ជាតិអាល្លឺម៉ង់រូបនេះ បានឈ្នះពានក្របខ័ណ្ឌ League 1 ចំនួន២លើក ក្នុងរដូវកាលដឹកនាំ២លើករបស់លោក ជាមួយ PSG និងបានដឹកនាំឲ្យក្លិបនេះ ឈានទៅប្រកួតក្របខ័ណ្ឌ Campions League ជាលើកដំបូង។ ប៉ុន្តែ លោកត្រូវបានគេបណ្តេញចេញ កាលពីខែមុន ក្រោយពីការចាប់ផ្តើមមិនបានល្អនៅរដូវកាលនេះ និងប៉ះទង្គិចពាក្យសម្តីជាមួយនឹងនាយកកីឡាលោក Leonardo។ ក្លិប Chelsea បានបណ្តេញអតីតតារាឆ្នើមរបស់ខ្លួនគឺលោក Frank Lampard កាលពីថ្ងៃចន្ទ ក្រោយពីការរងបរាជ័យ៥លើក ក្នុងចំណោមការប្រកួត Premier League ៨លើក ខណៈដែលក្លិបនៅទីក្រុងឡុងដ៍មួយនេះ ប្រឈមមុខនឹងការប្រជែងដ៏ស្វិតស្វាញមួយ ដើម្បីដណ្តើមយកកៅអី Champions League នៅរដូវកាលក្រោយ។ ការប្រកួតទី១របស់លោក Tuchel ក្នុងនាមជាគ្រូបង្វឹក បានបញ្ចប់ក្នុងលទ្ធផលស្មើ ០-០ នៅលើទឹកដីខ្លួនឯង ពេលប្រកួតជាមួយនឹងក្រុម Wolves កាលពីថ្ងៃពុធ។
លោក Tuchel បាននិយាយក្នុងពេលបង្ហាញខ្លួនកាលពីថ្ងៃចន្ទថា៖ «ខ្ញុំបានជួបពេលវេលាដ៏ខកចិត្តនៅថ្ងៃបុណ្យណូអែល ហើយភ្លាមៗ រយៈពេល៤សប្តាហ៍ក្រោយមក ខ្ញុំរកឃើញកាដូដ៏ល្អបំផុត ដែលនៅតែបន្សល់ទុកនៅក្រោមដើមឈើ»៕
ប្រភពព័ត៌មាន៖ Channel News Asia
