បរទេស៖ លោក Ole Gunnar Solskjaer អ្នកចាត់ការទូទៅរបស់ក្រុម Manchester United បានបញ្ជាក់ថា ក្រុមរបស់លោកមិនគួរត្រូវបានចាត់ទុកថា ជាក្រុមប្រជែងពាន Premier League ឡើយ ក្រោយពីខ្សែប្រយុទ្ធ Dominic Calvert-Lewin បានរកគ្រាប់បាល់តាមស្មើឲ្យក្រុម Everton នៅនាទីបន្ថែម ខណៈដែលពួកគេបានវាយបក២លើកដើម្បីតាមស្មើ ៣-៣ នៅកីឡដ្ឋាន Old Trafford កាលពីថ្ងៃសៅរ៍។
ការដណ្តើមបានជ័យជម្នះ នឹងធ្វើឲ្យ Man United តាមស្មើពិន្ទុជាមួយនឹងក្រុមកំពុងនាំមុខ Manchester City ប៉ុន្តែ បច្ចុប្បន្ន ពួកគេបានកត់ត្រាជ័យជម្នះត្រឹមតែ១លើកគត់ក្នុងចំណោមការប្រកួត៤លើកចុងក្រោយ ខណៈលទ្ធផលនេះ កាន់តែធ្វើឲ្យគូប្រជែងរបស់ខ្លួន បន្ថែមការនាំមុខលើកំពូលតារាង។ Man City កំពុងតែនាំមុខ២ពិន្ទុដាច់ ប៉ុន្តែ ក៏នៅសល់២ប្រកួតក្នុងដៃផងដែរ ខណៈដែលការប្រកួតទី១របស់ពួកគេក្នុងចំណោមការប្រកួតទាំង២លើកនោះ គឺនៅលើទឹកដីក្រុមម្ចាស់ការពារជើងឯក Liverpool។
ទាក់ទងនឹងចំណាត់ថ្នាក់លើកំពូលតារាង លោក Solskjaer ដែលក្រុមរបស់លោកបានបញ្ចប់ដោយដេញតាមពីក្រោយ Liverpool ៣៣ពិន្ទុ កាលរដូវកាលមុន បានឲ្យដឹងថា៖ «យើងមិនមែនកំពុងតែនិយាយពីការឈ្នះពានឡើយ។ ក្រុមនេះ ត្រូវមានដំណើរដ៏វែងឆ្ងាយមួយ។ យើមិនគួរត្រូវបានចាត់ទុកថា ជាក្រុមប្រជែងពានឡើយ»៕
ប្រភពព័ត៌មាន៖ BBC