បរទេស៖ សហព័ន្ធកីឡាបាល់ទាត់ទ្វីបអឺរ៉ុបហៅកាត់ថា UEFA បានប្រកាសកាលពីថ្ងៃចន្ទថា ការប្រកួតជើងទី១របស់ក្រុម Manchester City ក្នុងក្របខ័ណ្ឌ Champions League វគ្គ១៦ក្រុមចុងក្រោយរបស់ពួកគេជាមួយនឹងក្រុម Borussia Moenchengladbach នឹងត្រូវលេងនៅទីក្រុ Budapest ដោយសារតែការចេញបម្រាមដ៏តឹងរ៉ឹងលើការនាំចូលវីរុសកូរ៉ូណា ដែលត្រូវបានអនុវត្តដោយប្រទេសអាល្លឺម៉ង់។
ការប្តូរទីលានប្រកួតនេះ កើតឡើងក្នុងរយៈពេល២៤ម៉ោង ក្រោយពីការប្រកួតរបស់ក្រុម Liverpool ជាមួយនឹងក្រុម Leipzig នៅសប្តាហ៍ក្រោយ ក៏ត្រូវប្តូរទៅកាន់ទីក្រុង Budapest ផងដែរ ដោយសារតែហេតុផលដូចគ្នានេះ។ ក្រុម Man City របស់លោក Pep Guardiola នឹងត្រូវប្រកួតជាមួយនឹងក្រុម Gladbach នៅកីឡដ្ឋាន Puskas Arena នាថ្ងៃទី២៤ ខែកុម្ភៈ។ លោក Stephan Schippers នាយកប្រតិបត្តិរបស់ក្លិប Moenchengladbach បានឲ្យដឹងថា៖ «យើងត្រូវតែរំពឹងទុកថា បម្រាមស្តីពីការធ្វើដំណើរ ពីចក្រភពអង់គ្លេសទៅកាន់ប្រទេសអាល្លឺម៉ង់ ដែលបច្ចុប្បន្ននឹងត្រូវបន្តរហូតដល់ថ្ងៃទី១៧ ខែកុម្ភៈ នឹងត្រូវបន្តហួសពីនេះ និងគិតថា ក្រុម Manchester City នឹងមិនទទួលបានការអនុញ្ញាតពិសេសឲ្យធ្វើដំណើរទៅកាន់ Moenchengladbach ឡើយ»។
លោកបានបន្ថែមទៀតថា៖ «យើងបានសម្រេចចិត្តបែបនេះ ដោយផ្អែកទៅលើកិច្ចសន្ទនាជាច្រើនជាមួយនឹងអាជ្ញាធរពាក់ព័ន្ធ អ្នកនយោបាយ ក្របខ័ណ្ឌលីកអាល្លឺម៉ង់ និងសហព័ន្ធកីឡាបាល់ទាត់ទ្វីបអឺរ៉ុប កាលពីសប្តាហ៍មុន»៕
ប្រភពព័ត៌មាន៖ Channel News Asia