បរទេស៖ ក្លិប Real Madrid កាលពីថ្ងៃព្រហស្បតិ៍ បានបង្កើនសំណើរបស់ពួកគេដើម្បីទិញខ្សែប្រយុទ្ធ Kylian Mbappe ពីក្លិប Paris Saint-Germain រហូតដល់ទឹកប្រាក់១៨០លានអឺរ៉ូ (ស្មើនឹ២១១,៤លានដុល្លារអាមេរិក)។
នេះបើយោងទៅតាមការចេញផ្សាយរបស់កាសែតបារាំង L’Equipe។ បើយោងទៅតាមកាសែតដដែល ក្លិប Real មានបំណងផ្តល់តម្លៃខ្លួនជាគោលក្នុងទឹកប្រាក់១៧០លានអឺរ៉ូ បូករួមនឹងប្រាក់ឧបត្ថម្ភនានា១០លានអឺរ៉ូទៀត។ តម្លៃខ្លួននេះ នឹងស្មើនឹងតម្លៃខ្លួនដែលក្លិប PSG បានចំណាយទៅឲ្យក្លិប Monaco ដើម្បីទិញយកសមាជិកលើកពាន World Cup ជាមួយនឹងក្រុមបាល់ទាត់ជម្រើសជាតិបារាំង Mbappe កាលពីឆ្នាំ២០១៧។ កាលពីដើមសប្តាហ៍នេះ សំណើទី១របស់ក្លិប Real ដើម្បីទិញយកខ្សែប្រយុទ្ធវ័យ២២ឆ្នាំរូបនេះ ត្រូវបានច្រានចោល ដោយចាត់ទុកថា មិនគ្រប់គ្រាន់សម្រាប់ការលក់ឡើយ។
កិច្ចសន្យានាពេលបច្ចុប្បន្នរបស់ Mbappe ជាមួយនឹងក្លិប PSG នឹងផុតកំណត់នៅខែមិថុនា ឆ្នាំក្រោយ។ លោក Leonardo បានបញ្ជាក់ថា សំណើទី១របស់ក្លិប Real គឺជាការមិនគោរពេញ មិនស្របច្បាប់ និងមិនត្រឹមត្រូវ។ ប៉ុន្តែ លោកបានបន្ថែមទៀតថា៖ «ប្រសិនបើកីឡាករម្នាក់ចង់ចាកចេញ រូបគេនឹងចាកចេញ។ ក្លិបនេះ និងគម្រោង នៅតែសំខាន់ជាងនរណាទាំងអស់។ យើងបានធ្វើអ្វីៗសព្វបែបយ៉ាងហើយដើម្បីធ្វើឲ្យរូបគេបន្តនៅ»៕
ប្រភពព័ត៌មាន៖ Channel News Asia