បរទេស៖ លោក Jurgen Klopp អ្នកចាត់ការទូទៅរបស់ក្រុម Liverpool បានទទួលស្គាល់កាលពីថ្ងៃចន្ទថា លោកនឹងធ្វើការផ្លាស់ប្តូរកីឡាករសម្រាប់ការប្រកួតចុងក្រោយនៃពូលជាមួយនឹងក្រុម AC Milan ក្នុងក្របខ័ណ្ឌ Champions League បើមិនអ៊ីចឹងទេ ក្រុមគ្រូពេទ្យ នឹង «វ៉ៃ» លោក។
ក្រុមមានមូលដ្ឋាននៅ Anfield មួយនេះ នឹងធ្វើដំណើរទោកាន់ប្រទេសអ៊ីតាលី សម្រាប់ការប្រកួតនៅរាត្រីនេះ ក្រោយពីមានសុវត្ថិភាពក្នុងការបញ្ចប់ក្នុងចំណាត់ថ្នាក់លេខ១លើកំពូលតារាងនៃពូល B រួចជាស្រេច តាមរយៈការឈ្នះ៥លើកពីការប្រកួតទាំង៥លើក។ ប៉ុន្តែស្ថានភាពសម្រាប់ក្រុមរបស់អ៊ីតាលី មានភាពខុសគ្នាស្រឡះ ខណៈដែលពួកគេកំពុងតែស្ថិតក្នុងការប្រជែងជាមួយនឹងក្រុម២ទៀត ដើម្បីដណ្តើមយកចំណាត់ថ្នាក់លេខ២ រួមជាមួយនឹងក្រុម Porto និង Atletico Madrid ដែលនឹងត្រូវប៉ះគ្នាក្នុងប្រទេសព័រទុយហ្គាល់។
លោក Klopp បានបញ្ជាក់ថា លោកកំពុងតែធ្វើការសម្រេចចិត្តដើម្បីបន្ធូរបន្ថយបន្ទុកលើកីឡាករក្នុងជម្រើសដំបូងរបស់លោក ក្រោយពីធ្វើការប្រកួត៥លើកក្នុងរយៈពេល១៥ថ្ងៃ ស្របពេលដែលកម្មវិធីប្រកួតដ៏មមាញឹកក៏នឹងមកដល់ឆាប់ៗផងដែរ។ គ្រូបង្វឹកសញ្ជាតិអាល្លឺម៉ង់រូបនេះបានឲ្យដឹងថា៖ «យើងត្រូវតែផ្លាស់ប្តូរកីឡាករ យើងនឹងផ្លាស់ប្តូរ។ យើងត្រូវតែផ្លាស់ប្តូរកីឡាករ។ នោះគឺជាគោលដៅចម្បង។ ផ្នែកពេទ្យ នឹងវាយខ្ញុំ ប្រសិនបើខ្ញុំបានលេងការប្រកួតនេះជាមួយនឹងក្រុមជម្រើសដំបូង ហេតុនេះ ខ្ញុំនឹងផ្លាស់ប្តូរ»៕
ប្រភពព័ត៌មាន៖ Channel News Asia
