បរទេស៖ ក្រុម Everton បានបន្ថែមសម្ពាធលើលោកគ្រូបង្វឹក Jose Mourinho តាមរយៈការដណ្តើមបានជ័យជម្នះដ៏រំភើបក្នុងលទ្ធផល ៥-៤ លើក្រុម Tottenham បន្ទាប់ពីនាទីបន្ថែម១៥នាទី២ដង ដើម្បីឈានទៅប្រកួតពាន FA Cup វគ្គ៨ក្រុមចុងក្រោយ កាលពីថ្ងៃពុធ។
Tottenham ក៏នឹងត្រូវធ្វើដំណើរទៅប្រកួតជាមួយនឹងក្រុម Manchester City ក្នុងក្របខ័ណ្ឌ Premier League នៅថ្ងៃសៅរ៍ ផងដែរ ហើយការរងរាជ័យក្រោយពីបានលេងរយៈពេល១២០នាទី មិនមែនជាចំណុចដែលលោក Mourinho ចង់បានឡើយ។ Spurs បច្ចុប្បន្ន បានរងបរាជ័យ៤លើក ក្នុងចំណោមការប្រកួត៥លើកចុងក្រោយរបស់ពួកគេ ហើយឱកាសមួយក្នុងចំណោមឱកាសចំនួន៣ ដើម្បីបញ្ចប់ការរង់ចាំរបស់ក្លិបត្រឹមរយៈពេល១៣ឆ្នាំ សម្រាប់ការឈ្នះពានមួយ ពេលនេះ បានផុតរលត់ហើយ។ ក្រុមរបស់លោក Mourinho បានចាប់ផ្តើមយ៉ាងល្អនៅក្នុងការប្រកួតនាកីឡដ្ឋាន Goodison Park ស្របពេលដែល Davinson Sanchez បានជួយឲ្យពួកគេមានគ្រាប់បាល់នាំមុខមុន ក្រោយពីលេងបានត្រឹមតែ៣នាទី។
ប៉ុន្តែ ទោះបីជាយ៉ាងណា ការប្រព្រឹត្តកំហុសនៅតំបន់ការពារ ដែលបានជះឥទ្ធិពលអាក្រក់ដល់ក្រុម Tottenham ក្នុងរយៈពេលប៉ុន្មានខែចុក្រោយនេះ បានបង្ហាញឲ្យឃើញយ៉ាងច្បាស់ ខណៈដែលក្រុម Everton បានស៊ុតបាល់បញ្ចូលទី៣គ្រាប់ ក្នុងចន្លោះពេលត្រឹមតែ៧នាទី នៅមុនពេលបញ្ចប់តង់ទី១ តាមរយៈគ្រាប់បាល់របស់កីឡាករ Dominic Calvert-Lewin, Richarlison និង Gylfi Sigurdsson៕
ប្រភពព័ត៌មាន៖ Channel News Asia