បរទេស៖ ក្រុម Manchester City បានកត់ត្រាជ័យជម្នះជាលើកទី១៥ជាប់ៗគ្នា ក្នុងរាល់យុទ្ធនាការទាំងអស់ ក្រោយពីបានយកឈ្នះក្នុងលទ្ធផល ៣-១ នៅលើទឹកដីក្រុម Swansea City របស់ក្របខ័ណ្ឌ Championship ក្នុងាករប្រកួតពាន FA Cup ជុំទី៥ កាលពីថ្ងៃពុធ។
ជ័យជម្នះជាប់ៗគ្នានេះ គឺជាកំណត់ត្រាមួយសម្រាប់ក្រុមស្ថិតក្នុងក្របខ័ណ្ឌកំពូល ពោលគឺជាការបំបែកកំណត់ត្រាចាស់នៃការឈ្នះ១៤លើកជាប់ៗគ្នា ដែលសម្រេចបានដោយក្រុម Preston ក្នុងឆ្នាំ១៨៩២ និងក្រុម Arsenal ក្នុងឆ្នាំ១៩៨៧។ ខ្សែប្រយុទ្ធអន្តរជាតិប្រេស៊ីល Gabriel Jesus បានរកគ្រាប់បាល់ទី៣ឲ្យក្រុមខ្លួនតាមរយៈការគ្រប់គ្រងបាល់យ៉ាងល្អ មុននឹងស៊ុតបាល់ចូលជ្រុងម្ខាងនៃប្រអប់ទី ក្រោយពីខ្សែការពារ Kyle Walker និងខ្សែប្រយុទ្ធ Raheem Sterling បានជួយឲ្យពួកគេនាំមុខ២គ្រាប់មុន។ កីឡាករ Morgan Whittaker បានវាយបកបាន១គ្រាប់វិញសម្រាប់ក្រុមវេលស៍ នៅនាទី ទី៧៧ ប៉ុន្តែ ការខកចិត្តតែមួយគត់សម្រាប់ក្រុម Man City គឺការរងរបួសរបស់ខ្សែបម្រើ Rodri។
លោក Pep Guardiola គ្រូបង្វឹករបស់ Man City បានឲ្យដឹងថា៖ «យើងមកដើម្បីឈ្នះ ដែលនោះគឺជារឿងដ៏សំខាន់បំផុត។ យើងមិនអាចបដិសេធចំពោះភាពរីករាយ និងមោទនភាពដែលយើងមានបន្ទាប់ពីការបំបែកកំណត់ត្រាដ៏យូរអង្វែងមួយឡើយ។ កំណត់ត្រារង់ចាំឲ្យគេបំបែកប៉ុណ្ណោះ»៕
ប្រភពព័ត៌មាន៖ Channel News Asia
