បរទេស៖ លោក Ole Gunnar Solskjaer គ្រូបង្វឹកបិសាចក្រហម Man Utd លើកឡើងថា Liverpool អស់ឱកាសការពារពានក្របខ័ណ្ឌ Premier League រដូវកាលនេះហើយ បន្ទាប់ពីពួកគេបានបន្ថយគម្លាតកាន់តែឆ្ងាយដល់ទៅ១៣ពិន្ទុពីក្រុមកំពូលតារាង Manchester City ក្រោយចាញ់ Leicester កាលពីថ្ងៃសៅរ៏សប្តាហ៏មុន។
ទោះយ៉ាងណាគ្រូបង្វឹកសញ្ជាតិន័រវែជឿជាក់ថា Man Utd នៅតែមានឱកាសប្រជែងពានជាលើកដំបូង ក្រោយខកខានចាប់តាំងពីឆ្នាំ២០១៣ ទោះបីបានត្រឹមទទួលលទ្ធផលស្មើគ្នា ១ទល់និង១ ជាមួយ West Brom កាលពីថ្ងៃអាទិត្យ ហើយមាន៧ពិន្ទុប៉ុណ្ណោះតាមពីក្រោយក្រុមលោក Pep Guardiola។
សម្រាប់ Man City កំពុងសម្លឹងឃើញឪកាសលើកពាន ជាលើកទី ៣ ក្នុងរយៈពេល ៤ ឆ្នាំប៉ុន្តែលោក Solskjaer បានលើកឡើងប្រកបដោយការតាំងចិត្តថាមានតែក្រុម Man Utd របស់ខ្លួន និងក្រុម Leicester របស់លោក Brendon Roger ប៉ុណ្ណោះដែលនៅមានឪកាសប្រជែងតំណែង Premier League នៅរដូវកាលនេះ៕
ប្រភពព័ត៍មាន៖ Metro